Səhiyyə sahəsində çatışmazlığı daha çox münaqişə bölgələrinə yaxın yerlərdə, xüsusilə Tərtər və Ağdamda müşahidə etdik. Bu da gözlənilən bir şeydir. Həmin ərazilərdə uzun illərdir münaqişə səbəbindən gərginlik var. Səhiyyə işçilərinin həmin yerlərə gedib özlərini təhlükəsiz hiss etmələri və tibbi xidmətlər göstərmələri üçün şərait çətindir.
Aztibb.az xəbər verir ki, bunu Ümumdünya Səhiyyə Təşkilatının (ÜST) Səhiyyə ilə bağlı Ehtiyacların Qiymətləndirilməsi Missiyasının yekunlarına dair media brifinqində ÜST-ün Azərbaycandakı nümayəndəsi Hande Harmancı deyib.
Onun sözlərinə görə, sonuncu müharibədə də səhiyyə işçilərinin daha təhlükəsiz yerlərə getməyi gözlənilən idi: “İndi həmin yerlərdə çatışmayan səhiyyə işçilərini geri gətirmək çox vacibdir. Bununla bağlı işlər görülür. Bir sıra layihələrlə Azərbaycana dəstək olduğumuz kimi, bəlkə bu məsələdə də kömək edə biləcəyimizi düşünürük. Amma təbii ki, bu qısamüddətli olacaq. Uzunmüddətli həll üçün yenidən planlaşdırılmanın olması lazımdır. Bu səbəbdən biz həm Səhiyyə Nazirliyi, həm də TƏBİB-lə birgə çalışmaq istəyirik ki, uzun müddət üçün səhiyyə işçilərinin planlaşdırılmasını edək. Ancaq belə uzunmüddətli plan olarsa, həmin məsələnin həllinə nail ola bilərik”.
