Muxtar respublikanın səhiyyə müəssisələrində çalışan tibb işçilərinin hepatit B vaksini ilə immunlaşdırılması davam etdirilir.

Naxçıvan Muxtar Respublikası Səhiyyə Nazirliyindən Aztibb.az-a bildirilib ki, dörd orta tibb işçisindən (vaksinator daxil olmaqla) ibarət briqadalar noyabr ayından tibb işçilərinin hepatit B vaksini ilə immunlaşdırılması işini aparırlar.

Ötən müddətdə Naxçıvan Muxtar Respublika Xəstəxanasında, Doğum Mərkəzində, Stomatoloji Mərkəzdə 72, rayon mərkəzi xəstəxanalarında isə 149 nəfər hepatit B vaksini ilə immunlaşdırılıb.

Qeyd edək ki, həm obliqat, həm də risk qrupuna (xüsusilə ginekologiya, stomatologiya, cərrahiyyə, hemodializ, laboratoriya şöbələrinin işçiləri) daxil olduqları üçün tibb işçilərinin hepatit B virusuna yoluxma ehtimalı daha çoxdur. Odur ki, bu təhlükəli virus infeksiyası ilə qarşılaşmamaq üçün tibb işçilərinin hepatit B vaksini ilə immunlaşdırılması profilaktik tədbirlər sırasında xüsusi yer alır. Vaksinasiyanın növbəti turu üçün Naxçıvan Muxtar Respublikası Səhiyyə Nazirliyində komissiya yaradılıb.

Tibb müəssisələrinin baş həkimləri, dializ şöbəsi və ya bölmələrinin müdirləri də komissiyada təmsil olunublar.