Naxçıvan Muxtar Respublikası (MR) şəhər və rayonlarında fəaliyyət göstərən məktəblərdə I-VI siniflərdə təhsil alan şagirdlər arasında vərəmin erkən aşkar olunması məqsədilə kütləvi tuberkulin test sınaqları аparılır.

 

Naxçıvan MR Səhiyyə Nazirliyinin mətbuat xidmətindən Aztibb.az-a verilən məlumata görə, bu məqsədlə rayon xəstəxanaları və Əziz Əliyev adına Mərkəzi Uşaq Xəstəxanası, həmçinin gigiyena və epidemiologiya şöbələri tərəfindən xidmət ərazilərində tuberkulin testlərinə cəlb ediləcək şagirdlərin siyahıları tərtib olunub. Ərazi prinsipi üzrə 1 həkim və 2 tibb işçisindən ibarət xüsusi briqada yaradılıb. Zəruri hallarda tibb işçilərinin sayı 6 nəfərə çatdırılır. Sınaq materialının bölgüsünə və tədbirin yüksək səviyyədə həyata keçirilməsinə ciddi nəzarət edilir.

 

Kütləvi tuberkulin test sınaqlarına Kəngərli rayonunun xəstəlik halları müşahidə olunan tam orta məktəblərindən start verilib. Qıvraq qəsəbə, Şahtaxtı, Qarabağlar kəndlərində 1279 şagirdə diaskin test sınaqları qoyulub. 72 saat sonra sınağın nəticələri qiymətləndirilib və bu məktəblərdə vərəmə görə epidemioloji situasiyanın qənaətbəxş olduğu aşkarlanıb. Belə ki, müayinə olunan uşaqlarda vərəmə yoluxmanın aktiv fazası qeydə alınmayıb.

 

Tuberkulin testlərinin nəticələri qiymətləndirilərək şübhəli və müsbət reaksiyalı şagirdlərin Naxçıvan Muxtar Respublikası Ağciyər Xəstəlikləri Dispanserində dərin ftiziatr müayinəsinə, lazım gələrsə, müalicəsinə və kimyəvi profilaktikaya cəlb olunmaları üçün zəruri tədbirlər həyata keçirilib.

 

Qeyd edək ki, I-VI sinif şagirdləri arasında kütləvi tuberkulin test sınaqları dekabrın 21-dək Şahbuz rayonunun Şahbuzkənd, Naxçıvan şəhərinin Tumbul, Culfa rayonunun Göydərə kəndlərində, Babək rayonunun Nehrəm və Cəhri qəsəbələrində və Şıxmahmud kəndində davam etdiriləcək.