"Web of Science" hər il dünyanın ən nüfuzlu alimlərinin adlarını açıqlayır.

Aztibb.az xəbər verir ki, 2020-ci ildə 21 tədqiqat sahəsi üzrə ən çox istinad olunan alimlər qrupunda azərbaycanlı alim, Rusiya Elmlər Akademiyası Bitki Fiziologiyası İnstitutunun laboratoriya müdiri, Biologiyanın Fundamental Problemləri İnstitutunun baş elmi işçisi, AMEA-nın Molekulyar Biologiya və Biotexnologiyalar İnstitutunun beynəlxalq Bionanotexnologiya laboratoriyasının müdiri, biologiya elmləri doktoru Süleyman Allahverdiyev də yer alıb.  

Qeyd edək ki, Süleyman Allahverdiyevin adı son üç ildə hər il bu siyahıda təqdim olunur. 

Alimin elmi araşdırmalarının nəticələri “Chemical Reviwers”, “Proceedings of National Academy of Science USA”, “The EMBO Journal”, “Journal of Photochemical and Photobiolgy”, “Photosynthesis Research”, “FEBS Letters” və s. nüfuzlu jurnallarda dərc edilir. 

Hirş indeksi 52 və 60 olan görkəmli alim 500-dən çox elmi əsər, 8 kitab və 6 ixtiranın müəllifidir. Onun tədqiqat işlərinə 17330-dan artıq istinad olunub.