Cücərdilmiş buğda ümumi möhkəmləndirici, cavanlaşdıran və müalicəvi vasitə kimi istifadə olunur.
Xarici ölkələrdə hazır cücərdilmiş buğda vakuum qablaşdırmalarda supermarketlərdə satılır.
Aztibb.az bildirir ki, cücərdilmiş buğda həzm sisteminin fəaliyyətini yaxşılaşdırır, sinir sisteminin funksiyalarına müsbət təsir edir, immuniteti gücləndirir, xərçəng xəstəliklərin profilaktik vasitəsi sayılır.
Cücərdilmiş buğdanı müntəzəm olaraq qəbul edən insanlar iş qabiliyyətinin, fəallığın artmasını hiss edirlər.
Adi buğda ilə müqayisədə, cücərdilmiş buğdanın kimyəvi tərkibi xeyli dəyişilir. Cücərdilmiş buğda zülallar, E, B qrupu vitaminləri, sink, dəmir, kalium və s. mikro- və makroelementlərlə çox zəngindir.
E vitamini orqanizmdə gedən qocalma prosesləri ilə mübarizə aparır, bərpa proseslərini sürətləndirir.
Həmçinin cücərdilmiş buğda B qrupu vitaminləri ilə zəngindir. Bu vitaminlər sinir və mədə-bağırsaq sistemləri üçün çox vacibdir.
Cücərdilmiş buğdanın tərkibində olan fol turşusu orqanizmin qanyaratma funksiyası üçün çox vacibdir. Həmçinin fol turşusu hamilə qadınlar üçün ən vacib olan vitamindir. Fol turşusu döldə sinir sisteminin qusurlarının qarşısını alan əsas vasitə kimi tanınır. Məhz bu səbəbdən həkimlər bütün hamilə qadınlara fol turşusunu həb şəklində təyin edirlər.
Cücərdilmiş buğda, həmçinin sinklə zəngindir. Sink insanın immun sisteminə çox müsbət təsir edir, dərini qocalmaqdan saxlayır. Bu xüsusilə qadınlar üçün vacibdir. Kosmetik sənaye tərkibində cücərdilmiş buğda olan çoxsaylı krem və maskalar istehsal edir.
Sink insanın cinsiyyət sisteminin normal fəaliyyəti üçün də çox vacibdir. Xüsusilə bu kişirələ aiddir. Sink spermatozoidlərin hərəkətliliyini artırır. Sonsuzluqdan əziyyət çəkən kişilər bu təbii müalicəvi vasitədən istifadə edə bilərlər.
Cücərdilmiş buğdanı ev şəraitində hazırlamaq çox asandır. Bunun üçün buğda təmiz enli şüşə və ya minalanmış qaba tökülür, üzərinə ilıq suda isladılmış tənzif qoyulu və ev şəraitində saxlanılır (səməni cücərtdiyimiz kimi). 1-1,5 gündən sonra buğdanı istifadə etmək olar. Cücərti 3 mm kimi olmalıdır. Əks halda cücərdilmiş buğdanın xeyirli xüsusiyyətləri daha az olacaq.
Buğdanı əzib balla qarışdırın və səhər tezdən ac qarına qəbul edin (balsız da qəbul etmək olar). Həmçinin buğdanı istənilən tərəvəz salatlarına, süd məhsullarına əlavə etmək olar. Buğdanı az-az cücərdin. Cücərdilmiş buğdanı uzun müddət ərzində saxlamaq olmaz (1-2 gün soyuducuda). Saxlanma zamanı cücərdilmiş buğdanın faydalı xüsusiyyətləri itir.
Cücərdilmiş buğdanı cavanlaşdırıcı maskalar tərkibində istifadə etmək olar. Bunun üçün 2 xörək qaşığı buğdanı blenderdə əzin, 1 çay qaşığı zeytun yağı və 1 çay qaşığı limon şirəsi ilə qarışdırın və təmiz üz dərisinə çəkin. 20 dəqiqədən sonra maskanı ilıq su ilə yuyun və qidalandırıcı krem çəkin.
