Azərbaycanda yeni Milli Ulduz Təsnifat Sistemi əsasında otellərin ulduz təsnifatlaşdırılması aparılan zamanı onların koronavirusdan (COVID-19) qorunmaq üçün qoruyucu tədbirlərə hansı formada əməl etməsi də nəzərə alınacaq.

Aztibb.az xəbər verir ki, bunu Azərbaycan Hotel Assosiasiyasının (AHA) Baş icraçı direktoru Günay Sağlam deyib.

Onun sözlərinə görə, Azərbaycanda otellərin ulduz təsnifatlaşdırılması üçün tərtib olunan kriteriyalar sırasına COVID-19-la bağlı bənd də daxil edilib.

AHA-nın Baş icraçı direktoru hesab edir ki, COVID-19 virusu yox olsa belə, hələ 1 il müddətində bununla bağlı məsələlərin ulduz təsnifatlaşdırmasında nəzərə alınması lazımdır:

G.Sağlam qeyd edib ki, Azərbaycanda otellərə yeni Milli Ulduz Təsnifat Sistemi əsasında ulduzların verilməsi üçün hazırlıq işləri bitsə də və AHA bu prosesin həyata keçirilməsinə hazır olsa da, müharibənin başlanılması və COVID-19-la bağlı sərt karantin rejiminin tətbiqi səbəbindən təsnifatlaşdırma aparılmayıb.

O, əlavə edib ki, təsnifatlaşdırmadan keçmək istəyən otellər AHA-nın saytında qeydiyyatdan keçə bilərlər.