“Yardımlı Rayon Mərkəzi Xəstəxanası” publik hüquqi şəxsdə mövsümi qrip infeksiyasına qarşı vaksinasiya prosesinə başlanılıb.

Xəstəxanadan Aztibb.az-a bildirilib ki, vaksinasiya tədbirlərinin əsas məqsədi əhali arasında mövsümi qripə yoluxma riskini azaltmaq, xəstəliyin ağırlaşmalarının qarşısını almaq və ictimai sağlamlığın qorunmasına töhfə verməkdir.

Mövsümi qrip xüsusilə risk qrupuna daxil olan şəxslər — yaşlılar, xroniki xəstəliklərdən əziyyət çəkənlər, hamilə qadınlar və uşaqlar üçün daha ciddi fəsadlara səbəb ola bilər. Bu baxımdan, vaxtında vaksinasiya xəstəlikdən qorunmanın mühüm vasitələrindən biridir.

Yardımlı Rayon Mərkəzi Xəstəxanasında vaksinasiya prosesi “soyuq zəncir” sisteminin tələblərinə uyğun şəkildə, müvafiq təhlükəsizlik və gigiyena qaydalarına riayət olunmaqla həyata keçirilir.

Əhalini öz sağlamlığının qorunması istiqamətində profilaktik tədbirlərə məsuliyyətlə yanaşmağa və mövsümi qripə qarşı vaksinasiyada fəal iştirak etməyə çağırırıq.