Qaraciyərdə aşkarlanan bədxassəli şiş hər zaman bu orqanın özündə yaranmır. Yoğun bağırsaq, mədə, mədəaltı vəzi, süd vəzi və ağciyər xərçəngləri də qaraciyərə yayıla bilər. Üstəlik, bəzi qaraciyər şişləri uzun müddət heç bir aşkar əlamət vermədən inkişaf edir.

Aztibb.az "CNN Türk"ə istinadən yazır ki, professor Burak Işıqın sözlərinə görə, qaraciyərdə aşkarlanan şişin mənşəyini müəyyənləşdirmək düzgün müalicə planının hazırlanmasında mühüm əhəmiyyət daşıyır. Qaraciyərin öz toxumasından yaranan ilkin xərçənglə başqa orqandan yayılmış metastatik şişlər fərqli müalicə yanaşmaları tələb edir.

Mütəxəssisin sözlərinə görə, xüsusilə yoğun bağırsaq xərçəngi qaraciyərə tez-tez metastaz verir. Bunun səbəblərindən biri bağırsaqlardan gələn qanın portal vena sistemi vasitəsilə qaraciyərə daşınmasıdır.

Qaraciyər şişləri irəlilədikcə qarının sağ yuxarı hissəsində ağrı, dolğunluq hissi, iştahasızlıq, səbəbsiz çəki itkisi, halsızlıq və bəzi hallarda sarılıq yarana bilər. Lakin bu əlamətlər yalnız qaraciyər xərçənginə xas deyil. Buna görə də xüsusilə əvvəllər xərçəng diaqnozu qoyulmuş şəxslərdə qaraciyərdə aşkarlanan yeni törəmə diqqətlə araşdırılmalıdır.

Qaraciyərdəki hər törəmə bədxassəli olmur. Hemangioma, fokal nodulyar hiperplaziya, qaraciyər adenoması və kistlər kimi xoşxassəli törəmələrin əksəriyyəti müşahidə altında saxlanıla bilər. Bununla belə, bəzi törəmələrdə qanaxma və bədxassəliyə çevrilmə riski müdaxiləni zəruri edə bilər.

Professor Burak Işık vurğulayır ki, qaraciyərdə şiş aşkarlanması mütləq əməliyyat tələb olunduğu demək deyil. Müalicə qərarı şişin sayı, ölçüsü, yerləşməsi, qaraciyərin funksional vəziyyəti və xəstənin ümumi sağlamlığı nəzərə alınmaqla verilir. Cərrahiyyə ilə yanaşı, ablasiya, müdaxiləvi radioloji üsullar və dərman müalicəsi də tətbiq oluna bilər.

Mütəxəssis düzgün diaqnoz və xəstəliyin mərhələsinin dəqiq müəyyənləşdirilməsinin ən uyğun müalicə üsulunun seçilməsində əsas rol oynadığını bildirir.