Kron xəstəliyi həzm sisteminin müxtəlif hissələrini zədələyə bilən, xroniki iltihabla müşayiət olunan bağırsaq xəstəliyidir.
Aztibb.az xəbər verir ki, cərrah-proktoloq, endoskopist Anar Əliyevin sözlərinə görə, xəstəliyin əlamətləri hər insanda fərqli şəkildə özünü göstərə bilər və uzunmüddətli həzm problemlərini yalnız adi mədə-bağırsaq narahatlığı kimi qiymətləndirmək düzgün deyil.
Mütəxəssis bildirir ki, Kron xəstəliyi zamanı qarın ağrısı, uzunmüddətli ishal, çəki itkisi, halsızlıq, bəzi hallarda isə nəcisdə qan müşahidə oluna bilər. Əlamətlərin müxtəlifliyi xəstəliyin vaxtında tanınmasını çətinləşdirə bilər. Buna görə də həzm sistemində davamlı dəyişikliklər yarandıqda həkimə müraciət etmək və problemin səbəbini araşdırmaq vacibdir.
Anar Əliyevin sözlərinə görə, Kron xəstəliyinə şübhə olduqda diaqnozun dəqiqləşdirilməsi üçün qan və nəcis analizləri, endoskopik müayinələr, zərurət yarandıqda isə görüntüləmə üsullarından istifadə olunur. Kolonoskopiya zamanı götürülən toxuma nümunələrinin laborator müayinəsi, yəni biopsiya da diaqnostik prosesdə mühüm rol oynaya bilər. Müayinələrin nəticələri birlikdə qiymətləndirilərək xəstəliyin mövcudluğu, yayılma dərəcəsi və aktivliyi müəyyənləşdirilir.
Mütəxəssis qeyd edir ki, müalicənin əsas məqsədi yalnız ağrı, ishal və digər şikayətləri azaltmaq deyil, həm də iltihabı nəzarət altına almaq, xəstəliyin kəskinləşməsinin qarşısını almaq və remissiya dövrünü qorumaqdır. Müalicə strategiyası xəstəliyin aktivliyinə, həzm sisteminin hansı hissələrinin zədələnməsinə və pasiyentin fərdi xüsusiyyətlərinə uyğun müəyyən edilir. Bu səbəbdən bütün xəstələr üçün eyni müalicə yanaşmasının tətbiqi məqsədəuyğun deyil.
Anar Əliyev vurğulayır ki, həzm sistemində uzun müddət davam edən dəyişikliklərə laqeyd yanaşmaq və yalnız simptomları müvəqqəti aradan qaldırmağa çalışmaq əvəzinə, onların əsas səbəbini müəyyənləşdirmək lazımdır. Vaxtında aparılan müayinə və düzgün müalicə xəstəliyin gedişinə nəzarət etməyə, ağırlaşma riskini azaltmağa və pasiyentin həyat keyfiyyətini qorumağa kömək edə bilər.
