Beş yaşınadək uşaqlarda ağır infeksiyalara səbəb ola bilən Hemofilus influenzae tip b (Hib) bakteriyasına qarşı peyvəndlənmə ciddi xəstəliklərin qarşısının alınmasında mühüm rol oynayır.

Aztibb.az Kliniki Tibbi Mərkəzin məlumatına istinadən xəbər verir ki, bu bakteriya meningitə, pnevmoniyaya, sepsisə və tənəffüs yollarının təhlükəli şişməsi ilə müşayiət olunan epiglottitə səbəb ola bilər. Bu xəstəliklər vaxtında müalicə edilmədikdə həyati təhlükə yarada, bəzi hallarda isə qalıcı fəsadlarla nəticələnə bilər.

Hib infeksiyası əsasən tənəffüs damcıları və yoluxmuş şəxslərlə yaxın təmas vasitəsilə yayılır. Xüsusilə körpələr və beş yaşınadək uşaqlar ağır xəstəliyin inkişafı baxımından risk qrupuna daxildir.

Azərbaycanda Hib komponenti milli peyvənd təqviminə daxildir və uşaqlara kombinə olunmuş, beş və ya altı komponentli peyvəndlərin tərkibində vurulur. Peyvənd dozalarının vaxtı uşağın yaşına və tətbiq olunan peyvənd sxeminə uyğun müəyyən edilir. Buna görə valideynlərin peyvənd təqviminə əməl etməsi və peyvəndlənmə ilə bağlı suallarını pediatrla dəqiqləşdirməsi vacibdir.

Hib peyvəndinin geniş tətbiqi bu bakteriyanın törətdiyi invaziv infeksiyaların, o cümlədən meningit hallarının əhəmiyyətli dərəcədə azalmasına səbəb olub. Uşaqların vaxtında peyvəndlənməsi onların sağlamlığının qorunması və ağır infeksiyaların qarşısının alınması üçün ən mühüm profilaktik tədbirlərdən biridir.