Yorğunluq, yuxu çatışmazlığı, xroniki stress və eyni vaxtda bir neçə iş arasında davamlı olaraq keçid etmək unutqanlığı gücləndirə bilər.

Aztibb.az "Life" portalına istinadən xəbər verir ki, bu barədə tibb üzrə fəlsəfə doktoru Aleksandr Kalyujin bildirib.

Həkimin sözlərinə görə, problem əksər hallarda yaddaşın zəifləməsi ilə deyil, diqqətin dağınıq olması səbəbindən beynin məlumatı lazımi şəkildə qeydə ala bilməməsi ilə bağlıdır. Məsələn, insan hər hansı əşyanı vərdiş etdiyi yerə avtomatik şəkildə qoya bilər, lakin bir neçə dəqiqə sonra bu hərəkəti etdiyini xatırlamaya bilər.

Bu hal yorğunluq və emosional gərginlik fonunda daha çox müşahidə oluna bilər. Yuxunun kifayət qədər olmaması da diqqəti cəmləmək və yeni məlumatları yadda saxlamaq qabiliyyətini zəiflədə bilər.

Ekspert unutqanlığın qarşısını almaq üçün kifayət qədər yatmağı və informasiya yükünü azaltmağı tövsiyə edir. Həkim həmçinin eyni vaxtda bir neçə işlə məşğul olmaq vərdişindən uzaq durmağı və işləri ardıcıl şəkildə yerinə yetirməyi məsləhət görür.

Mütəxəssisin fikrincə, görülmüş hərəkətləri şüurlu şəkildə yadda saxlamağa çalışmaq da faydalıdır. Bu yanaşma diqqəti görülən işə daha yaxşı yönəltməyə və gündəlik vərdişləri tamamilə avtomatik şəkildə yerinə yetirməməyə kömək edir.