Smartfon, planşet və noutbuklardan uzun müddət istifadə uşaqlarda yalnız duruş pozuntularına deyil, üz-çənə sisteminin inkişafına və dişləmənin formalaşmasına da təsir göstərə bilər.

Aztibb.az "Medvestnik"ə istinadən yazır ki, ortodont Andrey Jukun sözlərinə görə, xüsusilə ekran qarşısında başı uzun müddət aşağı vəziyyətdə saxlamaq boyun, üz və alt çənə əzələlərinin fəaliyyətinə təsir edərək düzgün olmayan dişləmə riskini artıra bilər.

Mütəxəssis bildirir ki, qacetlərdən istifadə zamanı uşaqların ağzı tez-tez açıq qalır. Bu hal davamlı vərdişə çevrildikdə ağızdan nəfəsalma yarana və üz-çənə skeletinin inkişafına təsir göstərə bilər. Dilin düzgün mövqedə olmaması, dodaq və yanaq əzələlərinin fəaliyyətində dəyişikliklər də dişləmənin formalaşmasına təsir edən amillərdəndir.

Digər risk amili uşaqların daha çox yumşaq qidalar qəbul etməsi və çənələrə kifayət qədər funksional yük düşməməsidir. Yatmazdan əvvəl smartfondan istifadə isə yuxunun keyfiyyətinə mənfi təsir göstərə və əzələ gərginliyini artıra bilər.

Həkimlər qacetlərdən tamamilə imtina etməyi deyil, ekran qarşısında keçirilən vaxtın məhdudlaşdırılmasını, düzgün oturuşun qorunmasını, fiziki aktivliyin artırılmasını, burundan nəfəsalmanın təmin edilməsini və qidalanmada daha bərk qidalara üstünlük verilməsini tövsiyə edirlər.

Müasir ortodontiyada dişləmənin formalaşması yalnız dişlərin vəziyyəti ilə deyil, həm də nəfəsalma, dilin mövqeyi, əzələlərin fəaliyyəti, duruş və gündəlik vərdişlərlə əlaqələndirilir. Buna görə də düzgün vərdişlərin formalaşdırılması ortodontik problemlərin qarşısının alınmasında mühüm rol oynayır.