Oromandibulyar distoniya ağız, çənə, dil və üz əzələlərinin iradədən asılı olmayan, təkrarlanan yığılması və hərəkətləri ilə gedən nevroloji hərəkət pozuntusudur. Buna çənənin qeyri-iradi sıxılması və ya açılması, ağızın istəmədən büzülməsi, dilin qeyri-iradi hərəkətləri, danışarkən və ya yemək yeyərkən çənənin idarə olunmasının çətinləşməsi və bəzən ağızın açılmasının müvəqqəti məhdudlaşması aiddir.

Bu barədə Aztibb.az-a Xətai Tibb Mərkəzinin nevroloqu Könül Məmmədova məlumat verib.

Onun sözlərinə görə, sadəcə yemək zamanı çənənin şaqqıldaması və ağzın tam açılmaması daha çox çənə oynağının (TMJ) disfunksiyasını düşündürür. Distoniyada isə adətən qeyri-iradi əzələ yığılmaları və qəribə, təkrarlanan hərəkətlər də olur.

Həkim bildirib ki, əgər sizdə və ya tanıdığınız şəxsdə bu əlamətlər varsa, nevroloq müayinəsi ilə yanaşı gnatoloq/stomatoloq müayinəsi də məqsədəuyğundur.