Çin Elmlər Akademiyasının alimlərin hazırladığı modifikasiya edilmiş gil texnologiyası bir sıra ölkələrdə zərərli yosun çiçəklənmələrinin nəzarətdə saxlanılması məqsədilə tətbiq olunur.

Aztibb.az bu barədə english.cas.cn-ə istinadla məlumat verir.

Texnologiyanın hazırlanmasına səbəb Çində üç onillikdən əvvəl akvakultura təsərrüfatlarına ciddi zərər vuran zərərli yosun çiçəklənməsi olub. Belə hadisələr zamanı dəniz suyunun rəngi dəyişir, balıqlar və digər su canlıları kütləvi şəkildə məhv ola bilir. Tədqiqatçılar məhz bu problemin qarşısının alınması üçün modifikasiya edilmiş gil əsasında yanaşma hazırlayıblar.

Yeni texnologiyanın əsas məqsədi dəniz suyunda zərərli yosunların yaratdığı təhlükəni azaltmaqdır. Çin alimlərinin hazırladığı üsul artıq Malayziya və Türkiyə də daxil olmaqla bir sıra ölkələrdə tətbiq edilir. Akademiyanın məlumatında qeyd olunur ki, texnologiyanın daha geniş yayılması və beynəlxalq əməkdaşlığın gücləndirilməsi üçün 15 ölkənin iştirak etdiyi təşəbbüs də həyata keçirilir.

Texnologiyanın tətbiqinə dair nümunələrdən biri Türkiyənin İzmir körfəzində həyata keçirilən işlərdir. Çin Elmlər Akademiyasının materialında burada modifikasiya edilmiş gildən istifadə etməklə zərərli yosun çiçəklənmələrinin qarşısının alınmasına yönəlmiş təlim və praktiki fəaliyyətlərin aparıldığı bildirilir.

Zərərli yosun çiçəklənmələri yalnız dəniz ekosistemləri üçün deyil, həm də balıqçılıq və akvakultura təsərrüfatları üçün ciddi iqtisadi risk yaradır. Buna görə belə hadisələrin erkən müəyyənləşdirilməsi və yayılmasının məhdudlaşdırılması müasir ekoloji elmin və dəniz texnologiyalarının mühüm istiqamətlərindən biri hesab olunur.