Düz bağırsaq çatının (anal çatın) əməliyyatla müalicəsi xroniki və dərman müalicəsinə cavab verməyən hallarda tətbiq olunur.

Aztibb.az xəbər verir ki, ümumi cərrah, proktoloq Janna Xudaverdiyevanın sözlərinə görə, ən çox edilən əməliyyat lateral internal sfinkterotomiyadır.

Bu zaman anus ətrafındakı daxili sfinkter əzələsinin kiçik bir hissəsi kəsilərək spazm azaldılır və çatın sağalmasına şərait yaradılır.

Əməliyyatın müddəti adətən 15–30 dəqiqə olur. Yerli, spinal və ya ümumi anesteziya ilə həyata keçirilə bilər. Çox vaxt gündəlik həyata qısa müddətdə qayıtmaq mümkündür, tam sağalma isə bir neçə həftə çəkə bilər. Xroniki anal çatlarda effektivliyi yüksəkdir.

Əsas risk sfinkterin zədələnməsi səbəbindən qazı və ya nəcis saxlama qabiliyyətində problem yaranmasıdır. Bu risk xüsusilə əvvəlki anal əməliyyat, doğuş zədələnməsi və ya sfinkter zəifliyi olan qadınlarda nəzərə alınmalıdır.

Əgər çat ilk dəfə yaranıbsa və kəskin mərhələdədirsə, adətən birbaşa əməliyyat edilmir. Əvvəlcə nəcisin yumşaldılması, lif, ilıq oturaq vannalar və yerli preparatlarla müalicə sınanır.