72 yaşlı kişi və 73 yaşlı qadın 13 və 14 sentyabr 2026-cı il tarixlərində ağır vəziyyətdə Qazax Rayon Mərkəzi Xəstəxanasına hospitalizasiya edilib. Aparılan instrumental-laborator müayinələr nəticəsində hər iki pasiyentə beyin qan dövranının kəskin pozulması və işemik insult diaqnozu təyin olunub.
Bu barədə Aztibb.az-a Qazax RMX-dan məlumat verilib.
Bildirilib ki, pasiyentlər dərhal Reanimasiya şöbəsinə yerləşdirilib. Həkimlərin operativ və peşəkar müdaxiləsi, kompleks müalicə tədbirləri nəticəsində hər iki pasiyent komatoz vəziyyətdən çıxarılıb. Onların vəziyyətində müsbət dinamika müşahidə olunub, hərəkət və nitq funksiyalarında bərpa qeydə alınıb.
Hazırda müalicələri xəstəxanada davam etdirilən hər iki pasiyentin vəziyyəti stabil qiymətləndirilir.
