Xolesterin qanda olan, lipidlər adlanan yağabənzər maddələrdən biridir. Orqanizm sağlam hüceyrələrin formalaşması üçün xolesterinə ehtiyac duyur. Lakin qanda xolesterinin həddindən artıq olması damarların divarında yağlı çöküntülərin yaranmasına və nəticədə ürək-damar xəstəlikləri riskinin artmasına səbəb ola bilər.
Aztibb.az "Sciencefocus" saytına istinadən yazır ki, xolesterin səviyyəsinə nəzarət ürək-damar xəstəlikləri və insult riskinin azalmasına kömək edə bilər.
Yüksək xolesterinin qarşısının alınmasında qidalanma mühüm əhəmiyyət daşıyır. İlk növbədə doymuş yağlarla zəngin qidaların – yağlı ət, kolbasa, kərə yağı, pendir, peçenye, tort və piroq kimi məhsulların – qəbulunu azaltmaq tövsiyə olunur.
Bunun əvəzinə avokado, bitki yağları, qoz-fındıq və yağlı balıqlar kimi doymamış yağlarla zəngin qidalara üstünlük vermək faydalı ola bilər.
Müntəzəm fiziki aktivlik xolesterin səviyyəsinin yaxşılaşdırılmasına kömək edə bilər. Bunun üçün mütləq ağır məşqlər etmək lazım deyil. Gündəlik həyatda daha çox hərəkət etmək, məsələn, lift əvəzinə pilləkənlərdən istifadə etmək və ya sürətli gəzintiyə çıxmaq belə faydalı ola bilər.
Siqaretdən imtina etmək və alkoqol qəbulunu azaltmaq da ürək-damar sağlamlığına müsbət təsir göstərə bilər.
Həyat tərzində dəyişikliklər xolesterin səviyyəsini kifayət qədər azaltmadıqda, həkim dərman müalicəsi təyin edə bilər. Bu məqsədlə ən çox istifadə olunan preparatlar statinlərdir.
Statinlər qaraciyərdə xolesterinin əmələ gəlməsini azaltmaqla qanda, xüsusilə də LDL xolesterinin səviyyəsinin aşağı salınmasına kömək edir. Onlar adətən gündə bir dəfə qəbul edilir və bəzi insanlar üçün uzunmüddətli müalicənin tərkib hissəsinə çevrilə bilər.
Statinlərin ən çox bildirilən yan təsirlərindən biri əzələ ağrısıdır. Lakin bu hal hər statin istifadəçisində müşahidə olunmur. Dərman müalicəsinə başlamaq və ya preparatı dayandırmaq barədə qərar isə həkimlə məsləhətləşmədən verilməməlidir.
Xolesterinin nəzarətdə saxlanması üçün ən effektiv yanaşma insanın ürək-damar xəstəlikləri üzrə ümumi riskindən asılıdır. Buna görə qidalanma və fiziki aktivliklə yanaşı, mütəmadi tibbi müayinə və lazım gəldikdə həkim nəzarətində dərman müalicəsi də mühüm rol oynayır.
