Yeni tədris ilinin başlaması ilə uşaqların daha çox oturaq həyat tərzinə keçdiyini bildirən Fizioterapiya və Reabilitasiya üzrə mütəxəssis Dr. Öğr. Üyesi Safa Heybet, məktəb yaşlı uşaqlarda fiziki aktivliyin azalmasının qarşısının alınmasının vacibliyini vurğulayıb.

Aztibb.az "CNN Türk"ə istinadən yazır ki, Ümumdünya Səhiyyə Təşkilatının 5–17 yaşlı uşaqlar və yeniyetmələr üçün gündə ən azı 60 dəqiqə orta və ya yüksək intensivlikli fiziki aktivlik tövsiyə etdiyini xatırladan Heybet, hərəkətin yalnız idman məşqləri ilə məhdudlaşmamalı olduğunu bildirib. Onun sözlərinə görə, tənəffüslərdə oynamaq, gəzmək və məktəbə piyada gedib-gəlmək də gündəlik fiziki aktivliyin mühüm hissəsidir.

Mütəxəssis qeyd edib ki, uşaq günün bir hissəsində idmanla məşğul olsa belə, qalan vaxtını sinifdə, nəqliyyatda və ekran qarşısında oturaraq keçirirsə, uzunmüddətli hərəkətsizliyin yaratdığı risklər aradan qalxmır. Bu baxımdan yalnız idmana ayrılan vaxta deyil, gün ərzində ümumi hərəkətsizlik müddətinə də diqqət yetirmək lazımdır.

Heybetin sözlərinə görə, dərslər arasında 5–15 dəqiqəlik qısa hərəkət fasilələri uşaqların diqqətini azaltmır, əksinə dərsə daha yaxşı fokuslanmalarına və sinifdaxili davranışlarının müsbət istiqamətdə dəyişməsinə kömək edir. Buna görə də hərəkət üçün ayrılan vaxt təhsildən itirilən zaman deyil, uşağın zehni və fiziki baxımdan yenilənməsinə imkan verən proses kimi qiymətləndirilməlidir.

Mütəxəssis həmçinin uşaqların təhlükəsiz hərəkət edə bilməsi üçün məktəb həyətlərinin və ətraf infrastrukturun yaxşılaşdırılmasının, təhlükəsiz şərait olan ərazilərdə isə məktəbə piyada getməyin təşviq edilməsinin vacibliyini qeyd edib.