Kliinikadan Aztibb.az-a verilən məlumata görə, gənc qadın pasiyent illər əvvəl baş nahiyəsinə ağır travma almış və bunun nəticəsində sağtərəfli üz siniri iflici, göz qapağının funksional deformasiyası, nazolabial nahiyədə və dodaq bucağında yumşaq toxuma çatışmazlığı, həmçinin burun deformasiyası formalaşıb. Uzun illər davam edən bu dəyişikliklər pasiyentdə həm funksional, həm də psixoloji narahatlığa səbəb olub.

 

Professor Vaqif Qələndərin rəhbərliyi ilə bir əməliyyat çərçivəsində bir neçə rekonstruktiv mərhələ ardıcıl şəkildə həyata keçirilib. Sağ göz qapağının iflic nəticəsində tam bağlanmamasının korreksiyası məqsədilə xüsusi hazırlanmış qızıl lövhə göz qapağı toxumalarının altına yerləşdirilmişdir. Eyni zamanda sağ nazolabial büküş yenidən formalaşdırılmış, dodaq bucağında və ətraf yumşaq toxumalarda yaranmış atrofiya və həcm itkisi isə pasiyentin öz qalça nahiyəsindən götürülmüş dermofat greft vasitəsilə bərpa edilib.

 

Bundan əlavə, travma və uzunmüddətli deformasiya nəticəsində yaranmış burun və onun lateral nahiyəsindəki dəyişikliklər də eyni əməliyyat zamanı rekonstruktiv-estetik üsulla korreksiya olunub.

 

Beləliklə, bir cərrahi müdaxilə çərçivəsində üzün bir neçə anatomik və funksional nahiyəsində kompleks rekonstruksiya həyata keçirilib. Əməliyyatın mühüm xüsusiyyətlərindən biri onun Azərbaycan Tibb Universitetinin rezidentlərinin iştirakı ilə aparılması, bununla da müasir rekonstruktiv cərrahiyyə prinsiplərinin praktiki şəkildə mənimsənilməsi baxımından mühüm tədris əhəmiyyəti daşımasdır.