ATU-nun ağız, üz-çənə cərrahiyyəsi kafedrasının müdiri, Tədris Cərrahiyyə Klinikasının ağız-üz-çənə cərrahı, professor Çingiz Rəhimov 11 yaşlı oğlan uşağında aşkarlanan orbita (göz yuvası) sümüklərinin sınığı ilə bağlı mürəkkəb bərpa əməliyyatı həyata keçirib.

Bu barədə Aztibb.az-a Klinikadan xəbər verilib.

Orbita göz almasını qoruyan sümük strukturlardır. Bu sümüklərin zədələnməsi nəticəsində göz alması öz normal anatomik yerini dəyişir ki, bu da görmə funksiyasında müxtəlif problemlərə səbəb ola bilir. Belə ki, pasiyentdə travmadan sonra kifayət qədər vaxt keçdiyi üçün sümüklər düzgün mövqedə bitişməyib və nəticədə həm funksional, həm də kosmetik dəyişikliklər müşahidə olunub.

Professor Çingiz Rəhimovun sözlərinə görə, əməliyyatın əsas məqsədi düzgün bitişməmiş sümükləri təkrar sındırıb (repozisiya/reparasiya) düzgün anatomik mövqedə bərpa etməkdir.

Yeni pozisiyada yerləşdirilən sümüklərin mütləq fiksasiya olunması vacibdir. Bunun üçün titan mini-lövhələrdən istifadə edilir. Titan materialının insan orqanizmi tərəfindən tam qəbul edilməsi səbəbindən bu lövhələr ömür boyu bədəndə qala bilir və heç bir zərər vermir. Yalnız nadir hallarda, əsasən pasiyentlərin özlərinin tələbi ilə (bədəndə yad cisim qalmasını istəməmələri səbəbindən) lövhələr çıxarılır.

Qeyd edək ki, əməliyyat tam olaraq gözə görünməyən kəsiklərlə aparılıb. Almacıq sümüyünün gözaltı nahiyyədə yerləşdiyini nəzərə alaraq, sınığın olduğu hər üç nöqtədə lokal girişlər toxuma daxilindən həyata keçirilib. Kəsiklərin dəri üzərində deyil, göz qapağının daxili hissəsindən aparılması sayəsində əməliyyatdan sonra pasiyentdə heç bir görünən iz qalmayıb.