ATU-nun Neyrocərrahiyyə kafedrasının assistenti, Tədris Cərrahiyyə Klinikasının neyrocərrahı İsmayıl Qarayev 32 yaşlı qadın pasiyentdə aşkarlanan fəqərəarası disk yırtığının cərrahi müalicəsi barədə Aztibb.az-a məlumat verib.

Neyrocərrah İsmayıl Qarayev bildirib ki, pasiyent sol ayağında kəskin, bel nahiyəsindən ayağa və barmaqlara qədər yayılan (irradiasiya edən) ağrılarla klinikaya müraciət edib. Aparılan MRT müayinəsi zamanı L5-S1 səviyyəsində fəqərəarası diskin soltərəfli foraminal və paramedian yırtığı müəyyən edilib.

Pasiyentə fəqərəarası disk yırtığının mikroskopik üsulla xaric edilməsi əməliyyatı icra olunub. Əməliyyat zamanı L5-S1 səviyyəsində interlaminar yanaşmadan istifadə edilməklə fəqərə qövsləri arasından nahiyəyə daxil olunub, disk yırtığı xaric edilib və sinir kökü tam şəkildə kompressiyadan azad edilib.

İsmayıl Qarayev qeyd edib ki, bel və ayağa yayılan ağrılara səbəb olan fəqərəarası disk yırtıqlarına müxtəlif yaş qruplarında rast gəlmək mümkündür. Bu patologiyalar daha çox 30-50 yaş aralığında müşahidə olunsa da, daha gənc və yaşlı pasiyentlərdə də meydana çıxa bilər.

Neyrocərrah bildirib ki, cərrahi müdaxilənin nəticəsi və mümkün fəsadlar əməliyyatın düzgün və dəqiq icra olunmasından asılıdır. Müasir cərrahi yanaşmalarla və yüksək dəqiqliklə icra edilən əməliyyatlarda fəsadların yaranma riski minimaldır.

Həkimin sözlərinə görə, əməliyyatdan sonra fəqərəarası disk yırtığının təkrarlanması, yəni residiv yırtığın yaranması da mümkündür. Bu hal dünya üzrə təxminən 3-5 faiz pasiyentdə müşahidə olunur.