Saç yolma ilə xarakterizə olunan trixotillomaniya pozuntusu bəzi hallarda ciddi sağlamlıq problemlərinə səbəb ola bilər. İnsan saçını yolub udduqda saçlar mədədə toplanaraq böyük kütlə — trixobezoar yarada bilər.

Aztibb.az "Sciencealert" nəşrinə istinadən yazır ki, saçın tərkibindəki keratin həzm sistemində parçalanmadığından, zaman keçdikcə mədədə yığıla və həzm traktının fəaliyyətini poza bilər. Saç kütləsinin mədədən nazik bağırsağın ilk hissəsi olan onikibarmaq bağırsağa qədər uzandığı son dərəcə nadir hallar “Rapunzel sindromu” adlandırılır.

Bu vəziyyət adətən saç yolma və saç yemə — trixofagiya ilə əlaqələndirilir və bəzi hallarda obsesiv-kompulsiv pozuntu kimi psixiatrik problemlərlə müşayiət olunur.

16 yaşlı qızda gözlənilməz aşkarlanma

Journal of Medical Case Reports jurnalında dərc olunan yeni klinik hadisə bu sindromun heç bir aşkar əlamət olmadan da inkişaf edə biləcəyini göstərib.

16 yaşlı qız bir gün davam edən güclü qusma şikayəti ilə xəstəxananın təcili yardım şöbəsinə müraciət edib. Kompüter tomoqrafiyası zamanı onun mədəsində böyük saç kütləsi aşkarlanıb.

Həkimlər müəyyən ediblər ki, trixobezoar mədə və onikibarmaq bağırsağı tutaraq mədə-bağırsaq traktında tıxanıqlığa səbəb olub. Kütlə endoskopik yolla çıxarıla bilmədiyindən xəstə əməliyyat olunub.

Maraqlıdır ki, qızda əvvəlcədən psixi xəstəlik, nəzərəçarpan saç tökülməsi və ya keçəlləşmə olmayıb. Əməliyyatdan sonra isə o, təxminən iki il əvvəl saçlarını yolub yeməyə başladığını bildirib. Bunu həftədə təxminən bir dəfə etdiyini və hər dəfə cəmi bir neçə saç teli yolduğunu deyib. Bu da vəziyyətin uzun müddət diqqətdən kənarda qalmasına səbəb ola bilər.

Həkimlər bildirirlər ki, trixotillomaniya və trixofagiya xəstələrin utanc və sosial damğalanma qorxusu səbəbindən gizlədə bildiyi davranışlardır. Buna görə də saç tökülməsi görünməsə belə, yeniyetmələrdə davamlı ürəkbulanma, qusma və ya qarın ağrısı zamanı trixobezoar ehtimalı nəzərdən keçirilməlidir.

Trixobezoarlar nadir olsa da, həzm traktında ciddi, hətta həyati təhlükəli fəsadlara səbəb ola bilər.