Kolonoskopiya müayinəsi zamanı bağırsaqda polipin aşkarlanması pasiyentlər arasında ən çox narahatlıq doğuran məqamlardan biridir.

Aztibb.az xəbər verir ki, cərrah-proktoloq və endoskopist, tibb üzrə fəlsəfə doktoru Anar Əliyevin sözlərinə görə, əksər hallarda polip elə müayinə aparıldığı anda xüsusi endoskopik alətlər vasitəsilə tam ağrısız şəkildə kəsilərək xaric edilir (polipektomiya icra olunur).

Çıxarılan toxuma nümunəsi dərhal laboratoriyaya – histopatoloji müayinəyə göndərilir. Bu analiz polipin hüceyrə strukturunu, onun xoşxassəli xarakter daşıdığını və ya gələcəkdə bədxassəli şişə çevrilmə riski (onkoloji potensialı) olub-olmadığını dəqiqləşdirməyə imkan verir.

Həkim vurğulayır ki, poliplərin vaxtında aşkarlanaraq çıxarılması və erkən müdaxilə gələcəkdə yarana biləcək kolorektal xərçəng kimi ciddi fəsadların və ağırlaşmaların qarşısını 100%-ə qədər almaq gücünə malikdir. Bu səbəbdən profilaktik endoskopik müayinələr həyati əhəmiyyət kəsb edir.

Kolonoskopiya zamanı polip aşkarlandıqda təşvişə düşməyə əsas yoxdur. Polipin ölçüsündən və sayından asılı olaraq xəstəyə fərdi nəzarət planı tərtib edilir. Beləliklə, bağırsaq divarında yeni törəmələrin əmələ gəlmə ehtimalı illər öncədən tam nəzarətə götürülür.