Çində beş yaşlı qız uşağı çəkisi 50 qram olan qızıl külçəni təsadüfən udub. Yad cisim təxminən altı saat uşağın mədəsində qaldıqdan sonra o, təcili tibbi yardım üçün paytaxtın Uşaq Tibb Mərkəzinə çatdırılıb. Hadisə barədə paytaxt Pediatriya İnstitutundan məlumat verilib.

Aztibb.az "Medvestnik"ə istinadən yazır ki, qız evdə uzunluğu 4,5 santimetr olan qızıl külçəni təsadüfən udub. Valideynləri uşağı bir neçə xəstəxanaya aparsalar da, orada təcili endoskopik müdaxilə ilə yad cismin çıxarılması mümkün olmayıb və uşaq ixtisaslaşmış tibb mərkəzinə yönləndirilib.

Xəstəxanaya yerləşdirildikdən sonra aparılan rentgen müayinəsi qızıl külçənin mədədə qaldığını təsdiqləyib. Həkimlər vəziyyəti potensial təhlükəli kimi qiymətləndiriblər.

Həkimlər ümumi anesteziya altında təcili endoskopik müdaxiləyə hazırlıq görüblər. Prosedur zamanı külçənin mədə boşluğunda yerləşdiyi və burada manipulyasiya üçün kifayət qədər məhdud sahənin olduğu müəyyən edilib.

Endoskopik briqada xüsusi ilgək vasitəsilə yad cismi tutaraq onu həzm traktının təbii yolu ilə ehtiyatla xaric edib. Çıxarılma prosesi cəmi bir neçə dəqiqə davam edib və qızıl külçə bütöv şəkildə mədədən çıxarılıb.