Xüsusilə masa arxasında çalışan insanlarda rast gəlinən yanlış qamət başın önə əyilməsi, çiyinlərin qabağa düşməsi və kürəyin yuvarlaqlaşması ilə xarakterizə olunur. Bu, tibbi diaqnoz deyil. Lakin eyni vəziyyətdə uzun müddət və tez-tez qalmaq boyun, çiyin və kürək nahiyəsində ağrı, gərginlik və hərəkət məhdudiyyətinə səbəb ola bilər.

Aztibb.az "Haber Türk"ə istinadən yazır ki, ortoped və travmatoloq Hakan Özerin sözlərinə görə, masa arxasında qısa müddət önə əyilmək xəstəlik hesab olunmur. Əsas problem bu vəziyyətin gün ərzində uzun müddət təkrarlanmasıdır.

Telefon istifadə edərkən boynunuzu nə qədər əyirsiniz?

Telefon və planşetdən uzun müddət aşağı baxaraq istifadə etmək “texnologiya boynu” (text neck) adlandırılan yanlış qamət formasına səbəb ola bilər. Kompüter ekranının çox aşağıda, uzaqda və ya yan tərəfdə yerləşdirilməsi də insanın fərqinə varmadan önə əyilməsinə gətirib çıxara bilər.

İş zamanı ekranın birbaşa qarşıda, göz səviyyəsində və ya bir qədər aşağıda yerləşdirilməsi, belin dəstəklənməsi və ayaqların yerə tam təmas etməsi daha düzgün iş vəziyyətinin qorunmasına kömək edir. Klaviatura və siçanın da bədəndən çox uzaqda olmaması vacibdir.

Bununla yanaşı, düzgün iş şəraiti yaratmaq saatlarla hərəkətsiz qalmaq demək deyil. Gün ərzində oturuş vəziyyətini dəyişmək, qısa fasilələr vermək, ayağa qalxmaq və hərəkət etmək də vacibdir.

Tək tərəfli yük daşımağa da diqqət!

Yanlış qamətə təsir edən amillər yalnız ekran istifadəsi ilə məhdudlaşmır. Ağır çantanı daim eyni çiyində daşımaq bədənin tarazlığı qorumaq üçün vəziyyətini dəyişməsinə və əzələ-skelet sisteminin birtərəfli yüklənməsinə səbəb ola bilər.

Bu səbəbdən çantanın çəkisinin insanın fiziki xüsusiyyətlərinə uyğun olması, lazımsız əşyaların daşınmaması və yükün mümkün qədər bərabər paylanması tövsiyə olunur.

Boyun və kürək ağrısını yalnız yanlış qamətlə əlaqələndirmək olmaz

Masa arxasında çalışan insanlarda yaranan hər boyun, çiyin və ya kürək ağrısının səbəbi yanlış qamət deyil. Əzələ gərginliyi, onurğa və fəqərəarası disk problemləri, sinirlərlə bağlı pozuntular, travmalar və digər əzələ-skelet sistemi xəstəlikləri də oxşar şikayətlərə səbəb ola bilər.

Uzun müddət davam edən və ya getdikcə artan ağrı, qola və ya ayağa yayılan ağrı, keyimə, qarışqa gəzməsi, güc itkisi və ya hərəkət məhdudiyyəti müşahidə olunarsa, həkim müayinəsindən keçmək vacibdir.

Ekspert qeyd edir ki, gündəlik vərdişlərə diqqət yetirmək əzələ-skelet sağlamlığının qorunmasında mühüm rol oynayır. Lakin uzunmüddətli ağrıları yalnız yanlış oturuşla əlaqələndirib diqqətdən kənarda qoymaq olmaz.