Yoğun bağırsaq xərçəngi dünyada geniş yayılmış onkoloji xəstəliklərdən biridir. Xəstəliyin erkən mərhələdə aşkarlanması müalicənin effektivliyi və sağalma şansının artırılması baxımından mühüm əhəmiyyət daşıyır. Bu baxımdan risk faktorlarının və ilkin əlamətlərin vaxtında tanınması, eləcə də profilaktik müayinələrin aparılması xüsusi önəm daşıyır.

Aztibb.az xəbər verir ki, qastroenteroloq-endoskopist Rəfael Həsənovun sözlərinə görə, yoğun bağırsaqda yaranan bəzi poliplər zamanla bədxassəli törəmələrə çevrilə bilər və onların erkən aşkarlanaraq çıxarılması xərçəngin inkişaf riskini əhəmiyyətli dərəcədə azalda bilər.

“Yoğun bağırsaq xərçənginin qarşısının alınmasında əsas məqamlardan biri xəstəliyə çevrilə biləcək dəyişikliklərin erkən mərhələdə müəyyən edilməsidir. Xüsusilə bağırsaqda yaranan poliplərin vaxtında aşkarlanması və uyğun müalicəsi gələcəkdə xərçəngin inkişafının qarşısının alınmasına kömək edə bilər”, – deyə həkim bildirib.

Mütəxəssis qeyd edib ki, qanlı nəcis yoğun bağırsaq xəstəliklərinin mühüm xəbərdaredici əlamətlərindən biridir. Bununla yanaşı, bağırsaq vərdişlərində davamlı dəyişiklik, uzunmüddətli qəbizlik və ya ishal, qarında ağrı və köp, eləcə də səbəbsiz çəki itkisi də diqqətdən kənarda qalmamalıdır.

Dəmir çatışmazlığı və buna bağlı halsızlıq da bəzi hallarda yoğun bağırsaqda gizli qanaxmanın göstəricisi ola bilər. Bu səbəbdən səbəbi müəyyən edilməyən dəmir çatışmazlığı aşkarlandıqda problemin mənbəyinin araşdırılması vacibdir.

Rəfael Həsənovun sözlərinə görə, yalnız şikayətlərin yaranmasını gözləmək düzgün yanaşma deyil. Risk qrupunda olan şəxslərdə profilaktik müayinələr xəstəliyin və xərçəngönü dəyişikliklərin erkən aşkarlanmasına imkan verir.

Kolonoskopiya yoğun bağırsağın daxili səthinin birbaşa qiymətləndirilməsinə, poliplərin və digər şübhəli dəyişikliklərin aşkarlanmasına, zərurət olduqda isə poliplərin götürülməsinə imkan verən mühüm müayinə üsuludur.

“Qanlı nəcis, bağırsaq vərdişlərində uzunmüddətli dəyişiklik, davamlı qəbizlik və ya ishal, qarın ağrısı, səbəbsiz çəki itkisi və dəmir çatışmazlığı kimi əlamətlər olduqda həkimə müraciəti gecikdirmək olmaz. Erkən aşkarlama bir çox hallarda müalicə imkanlarını əhəmiyyətli dərəcədə yaxşılaşdırır”, – deyə mütəxəssis vurğulayıb.

Sağlamlığınızı qorumaq üçün şikayətləri gözardı etməyin, risk faktorlarınızı həkimlə müzakirə edin və yaşınıza və fərdi risklərinizə uyğun profilaktik müayinələrdən vaxtında keçin.