Gecə saatlarında artan qıcqırma, ağızda yaranan turş dad və mədə möhtəviyyatının yuxarı qalxması yuxu keyfiyyətini kəskin şəkildə aşağı salır.

Aztibb.az xəbər verir ki, qastroenteroloq-endoskopist Dr. Rəfael Həsənovun sözlərinə görə, bu cür narahatlıqların qarşısını almaq üçün xəstələrin gecə yatış pozisiyasına xüsusi diqqət yetirməsi vacibdir.

Həkim bildirir ki, reflüks zamanı ən uyğun vəziyyət sol tərəfi üstə yatmaqdır, çünki bu duruş mədə turşusunun yemək borusuna qalxmasının qarşısını alır və gecə yaranan şikayətləri minimuma endirir. Əksinə, xüsusilə yatmazdan əvvəl qida qəbul edildikdə arxasıüstə yatmaq mədə möhtəviyyatının asanlıqla geri qayıtmasına və əlamətlərin daha da şiddətlənməsinə səbəb olur.

Bu səbəbdən reflüksdən qorunmaq, sağlam həzm və rahat yuxu təmin etmək üçün gecələr sol tərəfə yatmaq vərdiş halına gətirilməli, yatmazdan əvvəl ağır yeməklərdən uzaq durulmalı və ilkin simptomlara qarşı laqeyd qalınmamalıdır.