Döş qəfəsi aortasının anevrizması vaxtında müdaxilə tələb edən və həyati risk daşıyan ən təhlükəli damar patologiyalarındandır. Aorta divarının patoloji genişlənməsi ilə xarakterizə olunan bu xəstəlik yırtılma baş verdikdə qısa müddətdə ağır, hətta fatal nəticələrə yol aça bilir.

Aztibb.az xəbər verir ki, Respublika Diaqnostika Mərkəzində (RDM) invaziv radioloq Dr. Ağakişi Yəhyayev tərəfindən döş qəfəsi aortasının böyük anevrizması müasir TEVAR (Thoracic Endovascular Aortic Repair) üsulu ilə uğurla aradan qaldırılıb.

Əvvəllər bu tip ağır patologiyalarda əsasən açıq cərrahiyyə tətbiq olunurdusa, ən son endovaskulyar yanaşma kəsiksiz — kiçik giriş dəlikləri vasitəsilə damar daxilindən xüsusi stent-qreftin torakal aortaya yerləşdirilməsinə imkan yaradır. Bu klinik halda aortanın geniş sahəsini əhatə edən anevrizmanın qapalı üsulla müalicəsi aparılıb və bu həcmdə uzun aorta seqmentinin stent-qreftlə örtülməsi respublikada ilk dəfə RDM-də gerçəkləşdirilib.

Mürəkkəb müdaxilənin əsas mərhələlərini və uğurlu əməliyyat prosesini videoçarxdan izləyə bilərsiniz.