ABŞ-da aparılan yeni araşdırma şəkərli içkilərin müntəzəm istehlakı ilə mədə xərçəngi arasında əhəmiyyətli əlaqə olduğunu ortaya qoyub. Gündə ən azı bir porsiya şəkərli içki qəbul edən şəxslərdə mədə xərçənginə tutulma ehtimalı belə içkilərdən istifadə etməyənlərlə müqayisədə təxminən 2,45 dəfə yüksək olub.

Aztibb.az “Gastro Hep Advances” jurnalında dərc olunan məqaləyə istinadən yazır ki, bununla bağlı araşdırma "Massachusetts General Hospital" tərəfindən aparılıb. Tədqiqatın müəllifi, qastroenteroloq Endryu T. Çanın sözlərinə görə, bu, ABŞ əhalisi arasında şəkərli içki istehlakı ilə mədə xərçəngi arasındakı əlaqəni araşdıran ilk tədqiqatdır.

112 mindən çox insan 36 il ərzində izlənilib

Tədqiqatçılar iki genişmiqyaslı araşdırmanın məlumatlarını birləşdirərək 112 284 iştirakçını təhlil ediblər. 1986–2022-ci illəri əhatə edən 36 illik müşahidə dövründə 278 mədə xərçəngi hadisəsi qeydə alınıb.

Risk amilləri nəzərə alındıqdan sonra məlum olub ki, gündə ən azı bir porsiya, yəni təxminən 237 ml qazlı içki, meyvə şirəsi və ya idman içkisi qəbul edənlərdə mədə xərçəngi riski iki dəfədən çox yüksəkdir. Risk artımı kişilərdə təxminən iki dəfə, qadınlarda isə üç dəfəyə yaxın olub.

Tədqiqat zamanı süni dadlandırıcılarla şirinləşdirilmiş içkilərlə mədə xərçəngi arasında isə əlaqə aşkarlanmayıb.

Səbəb-nəticə əlaqəsi hələ sübut edilməyib

Mütəxəssislər bildirirlər ki, müşahidə xarakterli tədqiqatlar səbəb-nəticə əlaqəsini sübut etmir. Buna görə şəkərli içkilərin birbaşa mədə xərçənginə səbəb olduğunu demək hələ mümkün deyil. Bununla belə, əldə olunan nəticələr bu iki amil arasında güclü əlaqənin olduğunu göstərir.

Tədqiqatçılar şəkərli içkilərin mümkün təsir mexanizmləri arasında çəki artımı, insulin müqaviməti, steroid hormonlarının balansının pozulması, iltihab, DNT zədələnməsi və bağırsaq mikrobiotasında dəyişiklikləri nəzərdən keçirirlər.