Sağlam həyat tərzinə əməl etmək ürək-damar xəstəlikləri və ölüm riskini azalda bilər. Alimlər 2-ci tip diabeti olan 3612 insanın məlumatlarını təhlil edərək bu nəticəyə gəliblər. Tədqiqat Böyük Britaniyanın UK Biobank məlumatları əsasında aparılıb və nəticələr "eClinicalMedicine" jurnalında dərc olunub.

Aztibb.az jurnalın dərc etdiyi araşdırmaya istinadən xəbər verir ki, tədqiqatçılar iştirakçıların qidalanmasını, fiziki aktivliyini, istirahətini və sosial həyatını qiymətləndiriblər.

İştirakçıların həyat tərzi MEDLIFE adlı xüsusi indekslə qiymətləndirilib. Bu göstəricidə qidalanma ilə yanaşı, fiziki aktivlik, oturaq həyat tərzi, istirahət və sosial əlaqələr də nəzərə alınıb.

Tədqiqat necə aparılıb?

Araşdırmaya yaşı 40-70 arasında olan və 2-ci tip diabeti olan şəxslər daxil edilib. Onların qidalanması bir neçə dəfə aparılan 24 saatlıq sorğular vasitəsilə qiymətləndirilib. Fiziki aktivlik və gündəlik vərdişlər barədə məlumatlar isə UK Biobank anketlərindən götürülüb.

Tədqiqatçılar daha sonra iştirakçıların həyat tərzi göstəricilərini ürək-damar xəstəlikləri, insult, infarkt və ölüm halları ilə müqayisə ediblər.

Nəticələr

İştirakçıların orta yaşı 59,8 olub. Müşahidə müddətində 737 ciddi ürək-damar hadisəsi, 645 ölüm və 171 ürək-damar xəstəliyindən ölüm qeydə alınıb.

Nəticələr göstərib ki, həyat tərzi daha sağlam olan iştirakçılarda ciddi ürək-damar hadisələri riski 27 faiz, bütün səbəblərdən ölüm riski 26 faiz, ürək-damar xəstəliklərindən ölüm riski isə 51 faiz daha aşağı olub.

Alimlər bildirirlər ki, bu nəticələr sağlam qidalanma, fiziki aktivlik, kifayət qədər istirahət və sosial əlaqələrin ürək-damar sağlamlığında mühüm rol oynaya biləcəyini göstərir.