Dietoloq Natalya Pavlyuk şişkinlik yarandıqda hansı müayinələrdən keçməyin vacib olduğunu açıqlayıb.
Aztibb.az xəbər verir ki, “İzvestiya” nəşrinə açıqlamasında həkim şişkinlik yarandıqda ilk növbədə terapevtə müraciət etmək lazım olduğunu bildirib.
Mütəxəssisin sözlərinə görə, həkim müayinədən sonra zəruri analizləri təyin edir ki, bu zaman orqanizmdə zülal çatışmazlığını istisna etmək üçün ümumi zülal, albumin və transferrin səviyyələri yoxlanıla, həmçinin ümumi sidik analizi verilə bilər. O əlavə edib ki, şişkinlik həddindən artıq duz qəbulu ilə əlaqəli olan insanlarda, bir qayda olaraq, arterial təzyiq yüksək olur.
Pavlyuk bildirib ki, müayinələrin siyahısı şişkinliyin bədənin hansı nahiyəsində yaranmasından asılıdır. Məsələn, ayaqlarda şişkinlik olduqda həkim aşağı ətraf venalarının ultrasəs müayinəsini təyin edə bilər.
Bundan başqa, şişkinlik allergik mənşəli də ola bilər. Bu, o cümlədən süd məhsullarına qarşı reaksiyanın nəticəsində yarana bilər. Pavlyuk vurğulayıb ki, şişkinlik ağrı ilə müşayiət olunursa, xüsusilə həkimə müraciət etmək və bütün şikayətlər barədə mütəxəssisə ətraflı məlumat vermək lazımdır.
İmmunoloq-allergoloq Vladimir Bolibok bəzi həşəratların dişləməsindən sonra yaranan şişkinliklər barədə xəbərdarlıq edib. Onun sözlərinə görə, dərhal yaranan reaksiya qaşınan qabarcıqla özünü göstərir. Qabarcığın qaşınaraq qanadılması infeksiyanın yaraya düşməsinə səbəb ola bilər. Gecikmiş reaksiya isə bəzən bir, iki gün, hətta bir həftə sonra inkişaf edə bilər. Bu zaman dişləmə yerində bərk şişkinlik və temperaturun yüksəlməsi müşahidə oluna bilər.
Həkim-terapevt Lyudmila Lapa isti havalarda yaranan şişkinliklərə laqeyd yanaşmamağa çağırıb. Onun sözlərinə görə, belə hallarda tromb yaranması riski mövcuddur. Su-duz balansının pozulması da şişkinliklərin yaranmasına səbəb ola bilər. Buna görə kifayət qədər maye qəbul etmək vacibdir.
Həkim-dietoloq Mariyat Muxina sağlam yetkin insan üçün qarpızın gündəlik qəbul edilə bilən miqdarının 500 qramdan çox olmamasını tövsiyə edib. Bu miqdarın aşılması şişkinliyə və arterial təzyiqin kəskin yüksəlməsinə səbəb ola bilər.
Həmçinin neyroqastroenteroloq Andrey Simakov şişkinliklə artıq çəki arasındakı fərqi izah edib. Onun sözlərinə görə, insan gün ərzində az maye qəbul edib, axşam isə maye çatışmazlığını çoxlu miqdarda içki ilə kompensasiya edərsə, səhər saatlarında şişkinlik yarana bilər.
