Mövsüm dəyişiklikləri insanın həm fiziki, həm də psixoloji vəziyyətinə təsir göstərə bilər. Psixoloq İrem Kırım xüsusilə günəş işığından daha az yararlanmağın depressiv əhval-ruhiyyəni gücləndirə biləcəyini bildirib.

Aztibb.az "T24"ə istinadən yazır ki, mütəxəssisin sözlərinə görə, mövsümi depressiya zamanı həddindən artıq yemək, çəki artımı, enerji itkisi, çox yatmaq istəyi, sosial həyatdan uzaqlaşma və həyatdan əvvəlki qədər zövq almamaq kimi əlamətlər müşahidə oluna bilər.

Səhərlər çətin oyanmaq, yorğunluq, iştahanın artması, çəki alma, enerjinin azalması və halsızlıq da əsas əlamətlər sırasındadır. Konsentrasiyanın zəifləməsi, sosial fəaliyyətlərdən uzaqlaşma və ümidsizlik də diqqətdən kənarda qalmamalıdır.

Psixoloq qeyd edib ki, bu əlamətlər ən azı iki il ərzində mövsüm dəyişiklikləri zamanı təkrarlanırsa, mütəxəssisə müraciət etmək tövsiyə olunur.

Günəş işığının azalması təsir göstərir

Psixoloq mövsümi depressiyanın yaranmasında işıq dəyişikliklərinin mühüm rol oynadığını bildirib. Günəş işığının azalması yuxu rejiminə və serotonin səviyyəsinə təsir göstərə bilər.

Mövsümi depressiyanın müalicəsində işıq terapiyası, psixoterapiya və zərurət olduqda dərman müalicəsindən istifadə edilir.

mövsüm dəyişikliklərində psixoloji sağlamlığı qorumaq üçün 8 tövsiyə
Günəş işığından mümkün qədər faydalanın və açıq havada vaxt keçirin.
Müntəzəm yuxu rejimi formalaşdırın.
Həftədə bir neçə dəfə açıq havada gəzin.
Sağlam və balanslı qidalanın.
Sosial əlaqələrinizi qoruyun və özünüzü təcrid etməyin.
Hobbilərə və sevdiyiniz fəaliyyətlərə vaxt ayırın.
Stressli mühitlərdən uzaq durun və problemləri prioritetləşdirərək həll etməyə çalışın.
Nəfəs məşqləri, yoqa və digər rahatlaşdırıcı fəaliyyətlərə vaxt ayırın.

Mütəxəssis mövsümi depressiya əlamətlərinin gündəlik həyata mənfi təsir göstərdiyi halda peşəkar psixoloji və ya tibbi dəstək almaqdan çəkinməməyi tövsiyə edib.