Mütəxəssislər bəzi kosmetik vasitələrin uzunmüddətli istifadəsinin sağlamlıq üçün risk yarada biləcəyini bildirirlər
Günəş kremləri, qalıcı dırnaq boyaları və suya davamlı makiyaj məhsullarının tərkibindəki bəzi kimyəvi maddələrin uzunmüddətli və intensiv istifadəsinin sağlamlıq üçün risk yarada biləcəyi bildirilir.
Aztibb.az "Posta" nəşrinə istinadən yazır ki, Medipol Mega Universitet Xəstəxanasının tibbi onkologiya mütəxəssisi, dosent Burçin Çakan Demirel bildirib ki, bütün kosmetik məhsullar xərçəng riski daşımır. Lakin bəzi məhsullarda olan kimyəvi maddələrin uzun müddət və yüksək tezliklə istifadəsi sağlamlıq baxımından narahatlıq doğura bilər.
Mütəxəssis xüsusilə kimyəvi saç düzləşdiricilər, benzol əmələ gəlməsi riski olan məhsullar və ultrabənövşəyi (UV) şüalarla qurudulan qalıcı dırnaq boyalarından istifadə zamanı diqqətli olmağı tövsiyə edib.
Kimyəvi saç düzləşdiricilərə diqqət
Demirelin sözlərinə görə, son illərdə kosmetik məhsulların tərkibindəki bəzi kimyəvi maddələrin xərçəng riski ilə əlaqəsi araşdırılır. Xüsusilə kimyəvi saç düzləşdiricilərlə bağlı elmi məlumatlar diqqət çəkir.
Təxminən 34 min qadının iştirak etdiyi genişmiqyaslı araşdırmada kimyəvi saç düzləşdiricilərdən tez-tez istifadənin uşaqlıq xərçəngi riskini artıra biləcəyi müəyyən edilib. Bu riskdə formaldehid kimi bəzi kimyəvi maddələrin rol oynaya biləcəyi ehtimal edilir. Bununla belə, riskə səbəb olan konkret maddə hələ tam müəyyən edilməyib.
Məhsulun tərkibi və saxlanma şəraiti önəmlidir
Mütəxəssis bəzi kosmetik məhsulların tərkibində birbaşa benzol olmasa da, uyğun olmayan saxlanma şəraitində müəyyən komponentlərin benzola çevrilə biləcəyini qeyd edib.
Xüsusilə benzoyl peroksid tərkibli məhsulların uzun müddət yüksək temperaturda saxlanılması zamanı benzol əmələ gəlməsi riski yarana bilər. Həmçinin suya davamlılığı artırmaq üçün bəzi makiyaj məhsullarına əlavə edilən kimyəvi komponentlərin uzunmüddətli istifadəsinin mümkün sağlamlıq təsirləri araşdırılır.
Saxta kosmetik məhsullardan uzaq durmaq lazımdır
Demirel qalıcı dırnaq boyalarında əsas riskin məhsulun özündən daha çox onun qurudulması zamanı istifadə olunan UV şüalarına uzunmüddətli məruz qalma ilə bağlı olduğunu bildirib.
Onun sözlərinə görə, qalıcı dırnaq boyası istifadə edilərkən UV şüalarına məruz qalmanı azaltmaq üçün qoruyucu tədbirlər görülə bilər.
Mütəxəssis həmçinin talk pudralarının istehsal zamanı asbestlə çirklənmə ehtimalına görə diqqətlə qiymətləndirildiyini bildirib.
“Ən vacib məqam saxta və qeyri-qanuni şəraitdə istehsal olunan kosmetik məhsullardan uzaq durmaqdır. Bu məhsullarda saxlama müddətini artırmaq üçün sağlamlıq üçün zərərli kimyəvi maddələrdən istifadə edilə bilər. Kosmetik vasitələr etibarlı markalardan və etibarlı satış məntəqələrindən alınmalıdır”, - deyə Demirel vurğulayıb.
