Təcili tibbi yardım mütəxəssisləri və zəhərlənmələr üzrə məsləhət mərkəzləri bildiriblər ki, ilk yardım çantalarında olan “zəhər pompası” cihazlarının ilan sancması zamanı heç bir klinik faydası yoxdur. Əksinə, bu cihazlar toxuma zədələnməsini artıraraq nekroz riskini yüksəldə bilər.

Aztibb.az "CNN Türk"ə istinadən yazır ki, mütəxəssislərin sözlərinə görə, ilan zəhəri sancmadan sonra ilk dəqiqələrdə limfa sistemi ilə yayılmağa başlayır. Vakuum cihazları isə yalnız səthi qan və toxuma mayesini sorur, zəhəri orqanizmdən çıxara bilmir. Bundan əlavə, bu üsula vaxt itirilməsi zərərçəkənin vaxtında tibbi yardım almasını gecikdirə bilər.

Düzgün ilk yardım vacibdir

Beynəlxalq ilk yardım qaydalarına əsasən, ilan sancması zamanı yaranı kəsmək, ağızla sormaq, turniket bağlamaq və zəhər pompasından istifadə etmək qətiyyən tövsiyə edilmir.

Nə etmək lazımdır?

Zərərçəkəni mümkün qədər hərəkətsiz saxlayın və uzandırın.
Şişkinlik yarana biləcəyi üçün üzük, saat və dar geyimləri çıxarın.
Sancılan nahiyəni su və sabunla yuyaraq steril sarğı ilə örtün.
Zədələnmiş ətrafı hərəkətsiz saxlayın.
Aspirin, digər qan durulaşdırıcı preparatlar, alkoqol və kofein qəbulundan çəkinin.

Mütəxəssislər vurğulayırlar ki, ilan sancması təcili tibbi vəziyyətdir və ilk yardım göstərildikdən sonra zərərçəkən mümkün qədər tez tibb müəssisəsinə çatdırılmalıdır.