Xroniki ishal ciddi bağırsaq xəstəliklərinin əlaməti ola bilər.

Aztibb.az xəbər verir ki, cərrah-proktoloq, endoskopist Anar Əliyevin sözlərinə görə, 3–4 həftədən uzun davam edən ishal sadəcə qidalanma pozğunluğu ilə əlaqədar olmaya və müxtəlif həzm sistemi xəstəliklərindən xəbər verə bilər.

Mütəxəssis bildirir ki, xroniki ishalın səbəbləri arasında bağırsaqların iltihabi xəstəlikləri, infeksiyalar, qida dözümsüzlüyü, poliplər və digər yoğun bağırsaq patologiyaları yer ala bilər. Bu səbəbdən uzun müddət davam edən simptomlara laqeyd yanaşmaq düzgün deyil.

Həkimin sözlərinə görə, davamlı ishal orqanizmdə maye və elektrolit (mineral) itkisinə səbəb olaraq ümumi sağlamlığa mənfi təsir göstərə bilər. Bu vəziyyət xüsusilə yaşlı insanlar, uşaqlar və xroniki xəstəlikləri olan şəxslər üçün daha ciddi risk yaradır.

Anar Əliyev vurğulayır ki, səbəb müəyyən edilmədən özbaşına dərman qəbul etmək əvəzinə həkim müayinəsindən keçmək vacibdir. Dəqiq diaqnozun qoyulması üçün laborator analizlərlə yanaşı, zərurət yarandıqda endoskopik müayinələr də aparılır. Erkən diaqnostika xəstəliyin səbəbinin vaxtında müəyyən edilməsinə və uyğun müalicənin seçilməsinə imkan verir.