“Həkimlərimizi tanıyın!” rubrikasında bu dəfə körpə və uşaqların sağlamlığının keşiyində dayanan, pediatriya və neonatologiya sahəsində zəngin klinik təcrübəyə malik Dr. Aygün Sadıxova təqdim olunur.

Aztibb.az xəbər verir ki, Dr. Aygün Sadıxova Mərkəzi Gömrük Hospitalının Pediatriya şöbəsində pediatr-neonatoloq kimi fəaliyyət göstərir. Həkim yenidoğulmuşların müayinəsi və sağlamlıq vəziyyətinin qiymətləndirilməsi, uşaqların doğulduğu ilk gündən 17 yaşınadək müayinə və müalicəsi, vaksinasiya, həmçinin pediatrik qastroenterologiya, pulmonologiya, allerqologiya və otorinolarinqologiya istiqamətlərində tibbi xidmət göstərir.

Dr. Aygün Sadıxova 1994-2001-ci illərdə Azərbaycan Tibb Universitetinin Pediatriya fakültəsində ali tibb təhsili alıb. 2001-2002-ci illərdə K. Fərəcova adına Elmi-Tədqiqat Pediatriya İnstitutunda pediatriya üzrə internatura keçib.

Həkim müasir pediatriya və neonatologiya sahəsində biliklərini davamlı olaraq təkmilləşdirir. O, müxtəlif beynəlxalq konfrans, simpozium və təlimlərdə iştirak edib. 2022-ci ildə Türkiyənin İzmir şəhərində Ege Universitetinin Reanimasiya və Pediatriya şöbəsində neonatologiya üzrə rotasiya kursu keçib.

Peşə fəaliyyətinə 2002-ci ildə başlayan Dr. Aygün Sadıxova 2017-ci ilədək dövlət tibb müəssisəsində pediatr-neonatoloq kimi çalışıb. 2017-ci ildən Mərkəzi Gömrük Hospitalının Pediatriya şöbəsində fəaliyyətini davam etdirir.

Dr. Aygün Sadıxova haqqında daha ətraflı məlumatı Mərkəzi Gömrük Hospitalının rəsmi saytından əldə etmək mümkündür.