Mütəxəssislər sosial media və internetdə yayılan tövsiyələr əsasında həkim məsləhəti olmadan qəbul edilən qida əlavələrinin sağlamlıq üçün risk yarada biləcəyini bildirirlər

Mütəxəssislər xəbərdarlıq edirlər ki, sosial media və internetdə yayılan məsləhətlərə əsaslanaraq qida əlavələri və vitaminlərin nəzarətsiz istifadəsi sağlamlıq üçün ciddi risklər yarada bilər. Onların sözlərinə görə, bu məhsullar yalnız həkim və əczaçının nəzarəti, eləcə də laborator müayinələrin nəticələri əsasında qəbul edilməlidir.

Aztibb.az "Haber Türk"ə istinadən yazır ki, Türkiyə, Mərkəzi Asiya və Qafqaz ölkələri üzrə regional rəhbər vəzifəsində çalışan Dr. Onur Yaprak səhiyyə sahəsindəki son tendensiyalar, istehlakçı davranışları, vitaminlərin şüursuz istifadəsi və süni intellektin gələcəyi ilə bağlı fikirlərini bölüşüb.

Qazaxıstan, Monqolustan, Gürcüstan və Tacikistan da daxil olmaqla 11 ölkəni və təxminən 200 milyon əhalini əhatə edən regiona rəhbərlik etdiyini bildirən Dr. Yaprak əsas məqsədlərinin insanların həyat keyfiyyətini yaxşılaşdıran layihələrin həyata keçirilməsi olduğunu qeyd edib.

Vitamin və qida əlavələrinin təsadüfi istifadəsi təhlükəlidir

Dr. Onur Yaprak bildirib ki, cəmiyyətdə qida əlavələrinin nəzarətsiz istifadəsi sürətlə artır və bu, sektorun əsas narahatlıq doğuran məsələlərindən biridir.

Onun sözlərinə görə, internet və sosial şəbəkələrdəki tövsiyələrə əsaslanaraq insanların özbaşına vitamin və qida əlavələri alması getdikcə daha geniş yayılır. Halbuki, Türkiyə səhiyyə xidmətlərinə əlçatanlıq baxımından dünyanın üstün mövqedə olan ölkələrindən biridir və insanlar mütəxəssis məsləhətindən daha çox istifadə etməlidirlər.