Hamiləlik zamanı ilk dəfə aşkar olunan yüksək qan şəkəri gestasion diabet adlanır və bu vəziyyət həm ana, həm də körpə üçün müəyyən risklər yarada bilər.

Aztibb.az xəbər verir ki, həkim-endokrinoloq, tibb üzrə fəlsəfə doktoru Oqtay Hüseynovun sözlərinə görə, gələcək ananın özünü yaxşı hiss etməsi yüksək qan şəkərinin təhlükəsiz olduğu anlamına gəlmir.

Gestasion diabet bəzən heç bir aşkar simptom vermədən inkişaf edir. Məhz buna görə hamiləlik dövründə qan şəkərinin mütəmadi nəzarətdə saxlanılması və həkim tövsiyələrinə əməl olunması xüsusi əhəmiyyət daşıyır.

Qanda şəkərin uzun müddət yüksək qalması körpənin normadan artıq böyüməsinə – makrosomiyaya, dölətrafı mayenin artmasına – polihidramniona, həmçinin dölün oksigen çatışmazlığı riskinin yüksəlməsinə səbəb ola bilər. Bununla yanaşı, vaxtından əvvəl doğuş ehtimalı arta, bəzi hallarda isə doğuşun daha erkən başa çatdırılmasına və qeysəriyyə əməliyyatına ehtiyac yarana bilər.

Oqtay Hüseynovun sözlərinə görə, gestasion diabet diaqnozu qoyulduqdan sonra yalnız "bir az pəhriz saxlayaram" düşüncəsi ilə kifayətlənmək düzgün deyil. Qan şəkəri mütəmadi ölçülməli, qidalanma rejiminə ciddi əməl edilməli, fiziki aktivlik isə həkimin tövsiyəsinə uyğun şəkildə həyata keçirilməlidir.

Əgər pəhriz və fiziki aktivlik qan şəkərini hədəf göstəricilər daxilində saxlamağa kifayət etmirsə, vaxtında insulin müalicəsinə başlanılması tələb oluna bilər.

Endokrinoloq vurğulayır ki, hamiləlik zamanı insulin istifadəsi körpəyə zərər vermir. Əksinə, nəzarətsiz yüksək qan şəkərinin ana və döl üçün yarada biləcəyi fəsadların qarşısının alınmasına kömək edir.

Müasir tibbdə gestasion diabetin effektiv şəkildə idarə olunması mümkündür. Bunun üçün əsas şərtlərdən biri xəstəliyi kiçiltməmək, qan şəkərinə müntəzəm nəzarət etmək və vaxtında endokrinoloqa müraciət etməkdir.

Hamiləlik dövründə qan şəkərinin normal səviyyədə saxlanılması yalnız ananın sağlamlığı üçün deyil, körpənin normal inkişafı və gələcək sağlamlığı baxımından da mühüm əhəmiyyət daşıyır.

Əgər hamiləlik zamanı qan şəkəriniz yüksək çıxıbsa, bunu təxirə salmayın. Vaxtında düzgün nəzarət və müalicə sağlam ana və sağlam körpə üçün ən vacib addımlardan biridir.