Tərin özü demək olar ki, qoxusuzdur. Xoşagəlməz qoxu yalnız tər dəri səthindəki bakteriyalarla təmasda olduqdan sonra yaranır. Lakin bədəndən gələn adi qoxunun dəyişməsi bəzən yalnız gigiyena ilə bağlı deyil, həm də qaraciyər, böyrək və digər sağlamlıq problemlərinin əlaməti ola bilər.

Aztibb.az "Medikforum"a istinadən yazır ki, həkimi Yelena Aleksentsevanın sözlərinə görə, dəri üzərində yaşayan bakteriyalar tərin tərkibindəki üzvi maddələri parçalayaraq uçucu birləşmələr əmələ gətirir və insan həmin maddələri qoxu kimi hiss edir. Bu proses xüsusilə qoltuqaltı və qasıq nahiyəsində daha intensiv baş verir.

Mütəxəssis qeyd edib ki, bədən qoxusunun intensivliyinə bir sıra amillər təsir göstərir. Bunlara tərləmənin miqdarı, dərinin vəziyyəti, dəri mikroflorası, genetik xüsusiyyətlər, qidalanma və həyat tərzi daxildir.

"Artıq tərləmə zamanı bakteriyaların çoxalması üçün daha əlverişli mühit yaranır. Bundan əlavə, bəzi nahiyələrdə tüklər nəmi saxlayaraq qoxunun daha güclü hiss olunmasına səbəb ola bilər", – deyə Aleksentseva bildirib.

Həkim vurğulayıb ki, hətta müntəzəm duş qəbul etmək də bəzən problemi aradan qaldırmır. Hormonal dəyişikliklər, stress, qidalanma vərdişləri və dərinin mikrobiotasının tərkibi də bədən qoxusuna təsir edə bilər. Sarımsaq, soğan, acı ədviyyatlar və spirtli içkilər dəri vasitəsilə xaric olunan maddələr səbəbindən bədən qoxusunu dəyişə bilər.

Mütəxəssisin sözlərinə görə, heç bir aydın səbəb olmadan bədən qoxusunun uzun müddət dəyişməsi həkimə müraciət etmək üçün əsas ola bilər. Bəzi xəstəliklər özünəməxsus qoxularla müşayiət olunur:

Şəkərli diabet zamanı nəfəs və ya bədəndən aseton qoxusu gələ bilər;
Böyrək funksiyasının pozulması zamanı ammonyakı xatırladan qoxu yarana bilər;
Qaraciyər xəstəlikləri zamanı isə çürük yumurtaya bənzər spesifik qoxu müşahidə oluna bilər.

Xoşagəlməz bədən qoxusunu azaltmaq üçün həkim şəxsi gigiyenaya riayət etməyi, dəriyə uyğun qulluq vasitələrindən istifadə etməyi və hava keçirən təbii parçalardan hazırlanmış geyimlər seçməyi tövsiyə edib. O qeyd edib ki, dezodorantlar əsasən qoxunu maskalayır, antiperspirantlar isə tər ifrazını azaltmağa kömək edir.

Sonda həkim vurğulayıb ki, bədən qoxusu dərinin vəziyyəti, bakteriyalar, qidalanma və orqanizmin ümumi sağlamlıq durumunun qarşılıqlı təsiri nəticəsində formalaşır. Əgər adi bədən qoxusu qəfil dəyişir və bu vəziyyət uzun müddət davam edirsə, səbəbin müəyyənləşdirilməsi üçün həkim müayinəsindən keçmək tövsiyə olunur.