A (H1N1) qrip virusu, yəni donuz qripi, yüksək pandemiya potensialına malikdir və yeni təhlükəli ştammlar adətən təxminən hər 10 ildən bir meydana çıxır.

Aztibb.az "İzvestiya" nəşrinə istinadən yazır ki, bu barədə Rusiya Elmlər Akademiyasının akademiki, Rusiya Təhsil Akademiyası prezidentinin müavini Gennadi Onişşenko bildirib.

Onun sözlərinə görə, pandemiya yarada biləcək yeni qrip ştammları müəyyən dövrlərlə ortaya çıxır.

"Təxminən hər 10 ildən bir pandemiya potensialı olan yeni ştamm meydana gəlir. Yaxın vaxtlarda H1N1 (donuz qripi) virusunun daha yoluxucu və daha aqressiv xüsusiyyətlərə malik yeni variantının yaranacağını gözləyirik. Məhz buna görə virusların davamlı monitorinqini aparırıq", – deyə Onişşenko bildirib.

Akademik qeyd edib ki, hazırda yeni pandemiyadan təşvişə düşmək üçün əsas yoxdur. Onun sözlərinə görə, yeni virus ştammlarının yaranması təkamül prosesinin təbii hissəsidir və yoluxucu xəstəliklərin yayılması müəyyən dövri xarakter daşıyır.

Mütəxəssis vurğulayıb ki, virusların davamlı izlənilməsi mümkün təhlükələrin vaxtında aşkar edilməsinə və onların qarşısının alınması üçün zəruri tədbirlərin görülməsinə imkan verir.