Anal fistula anus ətrafında yaranan iltihabın dəriyə açdığı anormal kanal olub, ən çox keçirilmiş anal absesdən sonra inkişaf edən ciddi proktoloji problemdir.

Aztibb.az xəbər verir ki, cərrah-proktoloq, endoskopist, tibb üzrə fəlsəfə doktoru Anar Əliyevin sözlərinə görə, bu xəstəlik zamanı davamlı irinli ifrazat, təkrarlayan şişkinlik, ağrı, narahatlıq və paltarın tez-tez çirklənməsi kimi narahatlıq yaradan simptomlar müşahidə olunur.

Mütəxəssis vurğulayır ki, fistulanın yalnız dərman vasitələri ilə tam sağalması mümkün deyildir və müalicə taktikası xəstəliyin mürəkkəbliyinə, kanalın yerləşməsinə uyğun olaraq fərdi cərrahi yanaşma ilə müəyyən edilir. Pasiyentlərin nəzərə alması vacibdir ki, fistulanın xarici dəliyinin müvəqqəti bağlanıb sonra yenidən açılması problemin aradan qalxması demək deyil. Əksinə, belə hallarda iltihabi proses daxildə gizli şəkildə dərinləşir və xəstəlik vaxt keçdikcə daha mürəkkəb formaya keçir. Məhz bu səbəbdən erkən diaqnostika anal sfinkter əzələlərinin funksiyasının tam qorunması və uğurlu müalicə nəticəsinin əldə olunmasında həlledici rol oynayır.