Böyük Britaniyanın Dərman Vasitələri və Tibbi Məhsulların Tənzimlənməsi Agentliyi (MHRA) arıqlama məqsədilə istifadə olunan GLP-1 preparatları ilə əlaqəli olduğu ehtimal edilən 216 ölüm və 158 mindən çox əlavə təsir barədə məlumat aldığını açıqlayıb.

Aztibb.az xəbər verir ki, məlumatlar tirzepatid, semaqlutid və liraqlutid tərkibli preparatlara, o cümlədən "Mounjaro", "Wegovy" və "Saxenda"* dərmanlarına aiddir. Bildirişlər MHRA-nın"Yellow Card" monitorinq sistemi vasitəsilə toplanıb.
Qeyd olunub ki, bu məlumatlar yalnız mümkün əlaqəni göstərir və ölüm və ya ağırlaşmaların birbaşa dərmanlardan qaynaqlandığını sübut etmir. Bildirilib ki, preparatlar ölkədə milyonlarla pasiyentə təyin olunduğundan, əlavə təsirlərlə bağlı hesabatların sayına onların geniş istifadəsi və məlumatlılığın artması da təsir göstərə bilər.
MHRA təhlükəsizlik məlumatlarının təhlilini davam etdirdiyini, yeni risklər müəyyən edilərsə, bu barədə tibb işçiləri və ictimaiyyətin məlumatlandırılacağını qeyd edib. Agentliyin qiymətləndirməsinə görə, təsdiqlənmiş göstərişlər üzrə istifadə edildikdə GLP-1 reseptor aqonistlərinin faydaları hazırda potensial riskləri üstələyir.