Ayaqda əmələ gələn şiş, məşqdən sonra keçməyən ağrı və ya bel nahiyəsində narahatlıq bəzən adi zədə deyil, sümük toxumasının nadir, lakin aqressiv bədxassəli şişi olan Yuinq sarkomasının əlaməti ola bilər.

Aztibb.az "Doctor Piter" nəşrinə istinadən yazır ki, bu barədə patomorfoloq Dmitri Bulanov məlumat verib.

Mütəxəssisin sözlərinə görə, Yuinq sarkoması ən çox 10–18 yaşlı uşaq və yeniyetmələrdə, xüsusilə 12–17 yaş arasında rast gəlinir. Xəstəliyin ilk əlamətləri idman zədəsi, böyümə ağrıları və ya həddindən artıq fiziki yüklənmə ilə asanlıqla səhv salına bildiyi üçün diaqnoz gecikə bilər.

Həkim bildirir ki, davamlı sümük ağrısı, şişkinlik, axsaqlıq, yerli həssaslıq, bəzən qızdırma, halsızlıq, çəki itkisi və ya səbəbsiz sınıqlar Yuinq sarkomasının əlamətləri ola bilər. Bu simptomlar osteomielit, iltihab və ya idman travmasını xatırlatdığı üçün xəstəlik çox vaxt gizli inkişaf edir.

Xüsusilə əvvəllər zədə almış şəxslərdə bütün şikayətlərin travma ilə əlaqələndirilməsi diaqnostik səhvlərə səbəb ola bilər. Əgər ağrı və şişkinlik azalmır, gecələr daha da güclənir, ətrafın funksiyası pisləşir və standart müalicə nəticə vermirsə, diaqnoz mütləq yenidən qiymətləndirilməlidir.

Diaqnostikada ilk mərhələ rentgen müayinəsidir. Şübhə davam etdikdə isə maqnit-rezonans tomoqrafiyası (MRT) şişin sümük və yumşaq toxumalara yayılmasını daha dəqiq qiymətləndirməyə imkan verir. Xəstəliyin mərhələsini müəyyən etmək üçün kompüter tomoqrafiyası (KT), PET-KT və digər müayinələrdən də istifadə oluna bilər.

Mütəxəssis vurğulayır ki, ən vacib mərhələ düzgün planlaşdırılmış biopsiyadır. Ayaqdakı və ya bədənin digər hissəsindəki şişlərin kor-koranə çıxarılması və ya biopsiya edilməsi yolverilməzdir, çünki bu, sonrakı cərrahi müalicəni çətinləşdirə və xəstəliyin idarə olunmasına mənfi təsir göstərə bilər. Buna görə belə müdaxilələr yalnız sümük şişlərinin müalicəsində təcrübəli mütəxəssislər tərəfindən planlaşdırılmalıdır.