ABŞ-ın Eli Lilly şirkətinin piylənmə və diabetin müalicəsində istifadə olunan inyeksiya preparatları Zepbound və Mounjaro-nun satışları 2025-ci ilin ikinci rübündə gözləntiləri üstələyib.

Aztibb.az xəbər verir ki, şirkətin açıqlamasına görə, diabet üçün istifadə olunan Mounjaro preparatının satışları illik müqayisədə 91 faiz artaraq 9,94 milyard dollara çatıb. Piylənmənin müalicəsi üçün nəzərdə tutulan Zepbound isə 4,93 milyard dollar gəlir gətirib.

Bu preparatlar GLP-1 reseptor agonistləri qrupuna daxildir və son illərdə həm diabetin, həm də piylənmənin müalicəsində geniş istifadə olunur. Onlara artan tələbat arıqlama məqsədilə istifadə edilən iynələrin qlobal bazarda sürətlə böyüməsinə səbəb olub.

Eli Lilly-nin əsas rəqibi olan Danimarkanın Novo Nordisk şirkəti də piylənmə və diabet üçün hazırlanan Ozempic və Wegovy preparatları ilə bazarda güclü mövqeyə malikdir.

Mütəxəssislər qeyd edirlər ki, GLP-1 qrupuna aid preparatlar həkim nəzarəti ilə istifadə edilməlidir. Bu dərmanlar hər kəs üçün uyğun deyil və piylənmənin müalicəsində qidalanma, fiziki aktivlik və tibbi qiymətləndirmə ilə birlikdə tətbiq olunmalıdır.