Pişik allergiyası ən çox rast gəlinən məişət allergiyalarından biridir. Allergik reaksiyaya səbəb pişiyin tükü deyil, onun tüpürcəyi, dəri hissəcikləri, göz yaşı və piy vəzilərində olan Fel d 1 və Fel d 4 zülallarıdır. Tük isə sadəcə bu allergenləri daşıyır.

Aztibb.az xəbər verir ki, allergiya zamanı burun tutulması, asqırma, göz yaşarması, öskürək, dəri səpgisi, nəfəsalma çətinliyi, bəzi hallarda isə Kvinke ödemi və bronxial astma tutmaları müşahidə oluna bilər. Xüsusilə irsi meyillilik və bronxial astması olan şəxslərdə risk daha yüksəkdir.

Mütəxəssislər bildirirlər ki, tam hipoallergen pişik cinsi mövcud deyil. Bəzi cinslərdə allergen zülallarının miqdarı nisbətən az olsa da, onlar da allergik reaksiyaya səbəb ola bilər.

Diaqnoz allergoloqun müayinəsi, spesifik IgE və IgG analizləri, həmçinin dəri testləri ilə təsdiqlənir. Müalicə əsasən allergenlə təmasın məhdudlaşdırılması, antihistamin preparatlar və zərurət olduqda digər dərman vasitələrinin istifadəsini əhatə edir. Bəzi xəstələrdə allergen-spesifik immunoterapiya (ASİT) da tətbiq oluna bilər.

Allergiya yüngül keçərsə və ev heyvanını ailədə saxlamaq istənilərsə, mütəxəssislər evdə müntəzəm nəm təmizliyi aparmağı, otaqları tez-tez havalandırmağı, xalçaları azaltmağı, pişiyi mütəmadi daramağı və tualetinin təmizliyinə xüsusi diqqət yetirməyi tövsiyə edirlər.

Həkimlər vurğulayırlar ki, ev heyvanı götürməzdən əvvəl ailənin bütün üzvlərinin allergik həssaslığının yoxlanılması həm insanların, həm də heyvanın rifahı baxımından daha doğru seçimdir.