İnternetdəki videolar ilkin yardım barədə baza bilikləri verə bilər, lakin ürək-ağciyər reanimasiyası (ÜAR) bacarıqlarını tam mənimsəmək üçün praktiki təlim vacibdir.

Aztibb.az "Actualnews"a istinadən yazır ki, kardioloq Andrey Kandraxin müsahibəsində sosial şəbəkələrdə yayımlanan maarifləndirici materialların ilkin tibbi yardım bacarıqlarının öyrənilməsində rolundan danışıb.

Onun sözlərinə görə, internetdəki videolar ilkin yardım haqqında ümumi təsəvvür yarada bilər, lakin ürək-ağciyər reanimasiyası texnikasına inamla yiyələnmək üçün bu kifayət deyil. Ən optimal variant sertifikatlı təlimçilərdən praktiki hazırlıq keçməkdir.

Kardioloq qeyd edib ki, reanimasiyada əsas məsələ nəzəri bilik deyil, praktik tətbiq bacarığıdır. Sadəcə alqoritmi bilmək kifayət etmir, onu düzgün və vaxtında həyata keçirmək bacarığı da vacibdir.

Standart reanimasiya sxeminə döş qəfəsinə 30 dəfə bası və 2 nəfəs vermə daxildir. Lazımi ritmi qorumaq üçün sayma adətən 1000-dən başlanır (“1000, 1001, 1002” və s.).

Reanimasiya yalnız ürək dayanmasının aydın əlamətləri olduqda – nəfəsin və iri arteriyalarda nəbzin olmaması zamanı aparılmalıdır. Həkim vurğulayıb ki, bu vəziyyətdə vaxt itirmək olmaz, çünki beyində geri dönməz dəyişikliklərin yaranmasına qədər olan müddət çox məhduddur.

Zərərçəkənə əlavə xəsarət yetirməmək üçün (məsələn, qabırğaların sınmasının qarşısını almaq üçün) praktiki məşqlər, o cümlədən xüsusi manekenlər üzərində təlim keçmək vacibdir.

Bununla belə, həkim onlayn məzmunun faydasını da inkar etməyib. Onun fikrincə, fövqəladə vəziyyətdə hətta bir videodan əldə edilən ilkin bilik belə insan həyatını xilas edə bilər.

Geniş auditoriya üçün hazırlanan videolar insanlara öz imkanlarını qiymətləndirməyə və düzgün hərəkət prinsipini anlamağa kömək edir. Həkim hesab edir ki, belə maarifləndirici materiallar heç bir biliyin olmamasından daha yaxşıdır. Çünki fövqəladə vəziyyət istənilən vaxt baş verə bilər və yaxınlıqda olan istənilən insanın yardıma ehtiyacı yarana bilər.