Üzündə anadangəlmə nəhəng nevusu olan Luna Fennerin Sankt-Peterburqda keçirilən yekun əməliyyatı uğurla başa çatıb. Tikişlər avqustun 5-də çıxarılıb.

Aztibb.az "RIA Novosti" agentliyinə istinadən yazır ki, sosial şəbəkələrdə üzündəki doğuşdan olan böyük ləkəyə görə “Betmen maskalı uşaq” kimi tanınan amerikalı qız Luna Fenner son əməliyyatdan sonra tikişlərindən azad olub.

Qızın anası Kerol Fenner daha əvvəl bildirib ki, Luna özünü çox yaxşı hiss edir və tikişlərin çıxarılacağını səbirsizliklə gözləyirdi. Onun sözlərinə görə, qızı da bu anı böyük həyəcanla gözləyib.

Xatırladaq ki, Luna üzü demək olar ki, tamamilə örtən böyük qara doğuş ləkəsi ilə dünyaya gəlib. Bu, nəhəng melanositar nevus adlanan nadir dəri törəməsidir. Görünüşünün “Betmen” filmlərindəki maskaya bənzəməsi səbəbindən bu adla məşhurlaşıb.

Amerikalı həkimlər müalicəni həyata keçirməkdən imtina etmiş və ailəyə çox mürəkkəb, uzunmüddətli əməliyyat proqramı təklif etmişdilər. Uşağa kömək etməyə isə rusiyalı mütəxəssislər razılıq veriblər.