Anal abses anus ətrafında irin toplanması nəticəsində yaranan kəskin iltihabi xəstəlikdir. Bu hal əksər hallarda anus daxilində yerləşən kiçik vəzilərin infeksiyalaşması nəticəsində inkişaf edir.

Aztibb.az xəbər verir ki, bu fikirləri cərrah proktoloq, endoskopist Anar Əliyev deyib. Onun sözlərinə görə, irin toplandıqca toxumalarda təzyiq artır və bu, xəstələrdə güclü, döyünən ağrı ilə müşayiət olunur. Xəstəliyin əsas əlamətləri arasında anus nahiyəsində şişkinlik, qızartı, ağrı və bədən hərarətinin yüksəlməsi yer alır.

Həkimlər bildirirlər ki, absesin öz-özünə partlaması problemin aradan qalxdığı anlamına gəlmir. Belə hallarda sonradan anal fistula inkişaf edə bilər ki, bu da əlavə cərrahi müalicə tələb edən ağırlaşmalardan biridir.

Mütəxəssislər qeyd edirlər ki, anal absesdən şübhələnildikdə vaxt itirmədən həkim-proktoloqa müraciət etmək vacibdir. Vaxtında aparılan müayinə və düzgün cərrahi müdaxilə həm ağrının aradan qaldırılmasına, həm də mümkün ağırlaşmaların qarşısının alınmasına imkan verir.