Qarın nahiyəsində ağrı, mədədə yanma, şişkinlik və ürəkbulanma kimi əlamətlər əksər hallarda qastritin ilk xəbərdaredici siqnalları ola bilər.

Aztibb.az xəbər verir ki, qastroenteroloq-endoskopist Rəfael Həsənovun sözlərinə görə, bu simptomlar tez-tez təkrarlanırsa, özbaşına dərman qəbul etmək əvəzinə mütləq həkim müayinəsindən keçmək lazımdır.

Həkim bildirib ki, qastrit mədə selikli qişasının iltihabıdır və vaxtında diaqnoz qoyulub müalicə edilmədikdə daha ciddi sağlamlıq problemlərinə yol aça bilər.

Onun sözlərinə görə, qastritin əsas əlamətləri qarın nahiyəsində ağrı və narahatlıq, mədədə turşuluq hissi və göynəmə, şişkinlik və qaz, eləcə də ürəkbulanma və qusma ilə bilinir.

Ekspert qeyd edib ki, bu əlamətlər mütəmadi olaraq təkrarlanırsa, səbəbin müəyyənləşdirilməsi üçün mütəxəssisə müraciət edilməlidir. Çünki düzgün diaqnoz və vaxtında başlanılan müalicə gələcəkdə yarana biləcək ağırlaşmaların qarşısını almağa kömək edir.

Qastroenteroloq vurğulayıb ki, müalicə olunmayan qastrit mədə xorası, mədə-bağırsaq qanaxması və digər ciddi fəsadların yaranma riskini əhəmiyyətli dərəcədə artırır. Buna görə də uzun müddət davam edən mədə narahatlıqları laqeyd yanaşılmamalı və həkim nəzarətində qiymətləndirilməlidir.