Yay istirahətinin əsas ünvanları olan dəniz və hovuzlar həm sərinlənmək, həm də sağlamlığı möhkəmləndirmək üçün yaxşı seçimdir. Lakin gigiyena qaydalarına əməl edilmədikdə bu məkanlar göz infeksiyaları, allergik reaksiyalar və digər sağlamlıq problemləri üçün risk mənbəyinə çevrilə bilər. Oftalmoloqlar xəbərdarlıq edirlər ki, xüsusilə hovuz və dəniz suyunun gözlə təması bəzi hallarda uzunmüddətli müalicə tələb edən infeksiyalara səbəb olur. Sadə qoruyucu tədbirlərə əməl etməklə bu riskləri əhəmiyyətli dərəcədə azaltmaq mümkündür.
Aztibb.az xəbər vereir ki, mütəxəssislərin sözlərinə görə, həm dəniz, həm də hovuz suyundan gözlərə müxtəlif virus və bakteriyalar keçə bilər. Risk xüsusilə kontakt linza istifadə edən şəxslərdə daha yüksəkdir.
Kontakt linza ilə suya girməyin
Həkimlər kontakt linza istifadə edənlərə dənizə və ya hovuza girməzdən əvvəl linzalarını mütləq çıxarmağı tövsiyə edirlər. Əgər gözünüzdə linza olduğu halda suya girmisinizsə, həmin linzanı yenidən istifadə etməyin. Su ilə təmasdan sonra linzanın üzərində təhlükəli mikroorqanizmlər qala bilər və bu da buynuz qişanın ağır infeksiyalarına, hətta görmənin zəifləməsinə səbəb ola bilər.
Hovuz suyundakı kimyəvi maddələr də təhlükə yarada bilər
Mütəxəssislər bildirirlər ki, hovuz suyunun dezinfeksiyası üçün istifadə olunan xlor və digər kimyəvi maddələr bəzi insanlarda gözün selikli qişasını qıcıqlandıra bilər. Üzgüçülükdən sonra gözlərdə yanma, qaşınma, qızartı, sulanma və ya işığa həssaslıq yaranarsa, bu, allergik və ya toksiki reaksiyanın əlaməti ola bilər.
Hansı hallarda həkimə müraciət etmək lazımdır?
Aşağıdakı əlamətlər 24 saatdan çox davam edərsə və ya şiddətlənərsə, oftalmoloqa müraciət etmək vacibdir:
gözdə güclü qızartı və ağrı;
irinli ifrazat;
bulanıq görmə;
işığa baxarkən narahatlıq;
göz qapaqlarında şişkinlik.
Mütəxəssislər xəbərdarlıq edirlər ki, hovuzlardan keçən bəzi virus mənşəli göz infeksiyaları həftələrlə, bəzən isə aylarla davam edə və müalicə olunmadıqda fəsadlara səbəb ola bilər.
Gözlərinizi qorumaq üçün bu qaydalara əməl edin
Dənizə və ya hovuza kontakt linza ilə girməyin.
Mümkünsə, üzgüçülük eynəyindən istifadə edin.
Suya baş vurarkən gözlərinizi bağlı saxlayın.
Üzgüçülükdən sonra gözlərinizi təmiz su ilə yuyun.
Dəsmal, linza qabı və göz damcısı kimi şəxsi əşyalarınızı başqaları ilə paylaşmayın.
Gözlərinizi çirkli əllərlə ovuşdurmayın.
Hovuzun suyunun təmizliyinə və gigiyenik vəziyyətinə diqqət yetirin.
Həkimlər vurğulayırlar ki, yay istirahətini sağlam və təhlükəsiz keçirmək üçün sadə gigiyena qaydalarına əməl etmək kifayətdir. Xüsusilə uşaqlar, kontakt linza istifadəçiləri və allergiyaya meyilli şəxslər göz sağlamlığının qorunmasına daha diqqətli yanaşmalıdırlar.
